Saturday, March 16, 2013

Dingdung Sam Mung Ginra Ni Hta Matut Manoi Gasat Poi Byin Nga


Written by KNET

KIA Masat (4) Dap Ba, Masat (8) Dap Dung ginra kata de shang chyinglau hkawm nga ai Nammatu Daju Myen Asuya Hpyen Dap Hk.L.Y (130) Dap kata na hpyen hpung ni hpe 2013 March (14) ya shani hta hpunau Sam SSPP/SSA hpyen hpung ni Mung Maw, Man Bung kaw ninghkap gasat poi byin ai lam hpe chye lu ai.

Dai shani Myen Asuya hpyen dap Hk.L.Y (33), Hk.L.Y (291),Hk.L.Y (326) na pawng hpawm hpyen hpung ni gaw hpunau Sam SSPP/SSA ni na Loi Lan Hpyen Dap a dingdung maga na Loi Zay hpyen dap hpe mung maja sa htim gasat ai lam hpe chye lu ai.


Lai wa sai 2013 March (12) ya hta Hpunau Sam SSPP/ SSA hpyen hpung ni Dap jung tawn ai Loi Lan (Lung Hai) maga de Myen Asuya Hpyen Dap Hk.L.Y (291) Dap na hpyen hpung ni maja htu shadut lung wa ai majaw Hpunau Sam SSPP/SSA hpyen hpung ni kaw nna ninghkap gasat poi byin wa ai kaw nna matut manoi gasat poi byin nga ai lam hpechye lu ai.

Myen Asuya Hpyen Dap ni gaw Hpunau Sam SSPP/SSA ni dap jung nga ai Loi Lan Hpyen Dap hpe Ka-ni pat jasan masing Drug Enforcement Administration (DEA) a masing kata hta dai Loi Lan Hpyen Dap kaw Helicopter jahkring ra ai ngu ai ga baw hte Hpunau Sam SSPP/SSA ni a ginra de htu shadut lung wa ai re hpe chye lu ai.

Hpunau Sam SSA/SSPP ni gaw Myen Asuya hte gap hkat jahkring ai lam galaw tawn ai rai tim Myen Asuya Hpyen Dap ni gaw Hpunau Sam SSPP/SSA ni a ginra, Mung Hsu a sinpraw maga de htu tawn da ai Myen Asuya Hpyen Dap Ts.K.Hk (2), Ts.K.Hk (17) hpe dawm kau ai lam n-nga ai sha n-ga hpyen n’gun matut manoi naw jat nga ai lam hpe chye lu ai.

No comments:

Post a Comment

Comment မ်ားကုိ စီစစ္ျပီး တင္ေပးပါမည္။ မုိက္ရုိင္းေသာ၊ လူသားမဆန္ေသာ Commet မ်ား တင္မေပးပါ။