Friday, February 22, 2013

ငြိမ်းချမ်းရေးစောင့်ကြည့်ရေးအတွက် UN ၊ US ကဲ့သို့ နိုင်ငံကြီးများ ပါဝင်သင့်


သျှမ်းသံတော်ဆင့်
 
ငြိမ်းချမ်းရေးစောင့်ကြည့်ရေးအတွက် UN ၊ US ကဲ့သို့သော နိုင်ငံကြီး များမှလည်း ပါဝင်စေလိုကြောင်း ထိုင်းနိုင်ငံ ချင်းမိုင်မြို့ ၌ပြုလုပ်ခဲ့သော UNFC နှင့်အစိုးရတို့ပထမဆုံးအကြိမ်တရားဝင်တွေ့ဆုံပွဲတွင် ဆွေးနွေး ခဲ့သည်ဟု  UNFC ၏ဆွေးနွေး ရေးကော်မတီဝင်တဦးကပြောပါသည်။

“ကျနော်တို့ နိုင်ငံရေးတွေ့ဆုံဆွေးနွေးဖို့ အတွက် Frame Work ရယ် Peace Roadmap ၆ ချက်ရယ် အဓိက ထားဆွေး နွေးခဲ့ပါတယ်။ ဒါ့ အပြင် ငြိမ်းချမ်းရေးစောင့်ကြည့်ရေးအတွက် UN ၊ UK ၊ US ၊ ထိုင်းနဲ့ တရုတ်နိုင်ငံတွေကိုလဲ ပါဝင် စေချင် တယ် အစရှိသဖြင့်ဆွေးနွေး ခဲ့ကြ ပါတယ်။  ပင်လုံကဲ့သို့သော ညီလာခံနဲ့ပတ်သက်ပြီးတော့ အစိုးရဘက်က ပွင့်ပွင့်လင်းလင်း အကျယ်တဝင့် မဆွေးနွေးခဲ့ပါဘူး” - ဟု အဆိုပါ ပုဂ္ဂိုလ် က သျှမ်းသံတော်ဆင့်အားပြောပြသည်။


မြန်မာအစိုးရ၏ ငြိမ်းချမ်းရေးဖော်ဆောင်ရေးလုပ်ငန်းကော်မတီအဖွဲ့ နှင့် တိုင်းရင်း သားလူမျိုးများ ဖက်ဒရယ်ကောင်စီ UNFC တို့ နိုင်ငံရေးတွေ့ ဆုံဆွေးနွေးပွဲအတွက် အကြိုညှိနှိုင်းဆွေးနွေးပွဲကို  ထိုင်းနိုင်ငံ ချင်းမိုင်မြို့ ဟောလီးဒေးအင်း၌ ဖေဖော်ဝါရီလ ၂၀ ရက်မနက် ၉ နာရီမှ ညနေ ၅ နာရီအထိ ပြုလုပ်ခဲ့ပါသည်။ 

ယမန်နေ့ဆွေးနွေးပွဲ၌ သဘောတူညီမှု လက်မှတ်ရေးထိုးခြင်းမရှိခဲ့ပေ။ သို့သော် ၂ လအကြာ ထပ်မံဆွေးနွေးရန် နှစ်ဘက် သဘောတူခဲ့ကြ သည်ဟုဆို၏။

သို့သော်ဆွေးနွေးမှုအပြီး ညနေပိုင်း၌ သတင်းစာရှင်းလင်းပွဲတရပ်ကိုပါ ပြုလုပ်ခဲ့ပြီး ပူးတွဲကြေငြာချက်ကိုပါ ထုတ်ပြန်နိုင်ခဲ့ သည်။

အကျေအလည်ဆွေးနွေးခဲ့ရသည့်အချက်အချို့မှာ-

-ပူးတွဲကြေငြာချက်ထုတ်ပြန်ရန်အတွက် ဆွေးနွေးရေးခေါင်းစဉ်များကို အစိုးရဘက်မှ မထည့်စေချင်သဖြင့် နာရီဝက်ကြာ အချိန်ယူဆွေးနွေးခဲ့ရ ပြီး နောက်ဆုံး နေပြည်တော်ဘက်မှ ထည့်သွင်းရန်သဘောတူသည်ဟု ဆို၏။
- ထပ်မံဆွေးနွေးမည့်နေရာအား UNFC ဘက်မှမြန်မာနိုင်ငံမဟုတ်သော ပြည်ပ တနိုင်ငံတွင် ဥပမာ ဂျပန်နိုင်ငံတွင်ဟုဆိုရာ အစိုးရဘက်ကမူ မြန်မာငြိမ်းချမ်းရေးစင်တာတွင်သာပြုလုပ်စေလိုသည်ဟုဆို၏။ နောက်ဆုံး ထိုင်းနိုင်ငံအတွင်း၌သာ ထပ်မံပြုလုပ်ရန် သဘောတူခဲ့ကြ၏။
-ငြိမ်းချမ်းရေးစောင့်ကြည့်ရန် UN ၊ UK ၊ US ၊ ထိုင်း၊ တရုတ်၊ ဂျပန်တို့ လည်း ပါဝင်ကြောင်း ဆွေးနွေးရာတွင်လည်း သဘောတူညီမှုမရရှိ နိုင်ကြသေးပေ။

ယခုတကြိမ်ဆွေးနွေးမှုအား ဂျပန်နိုင်ငံ မစ္စတာ ယိုဟေးအိ ဆာဆာကာဝါ ဦးဆောင်သော နိပွန်ဖောင်ဒေးရှင်းက ကမကထ ပြုသည်။

၂၀၁၂ ဂျွန်လက ဂျပန်ဝန်ကြီးချုပ် ယိုရှိဟိကိုနိုဒါမှ ယိုဟေးအိ ဆာဆာ ကာဝါ အား မြန်မာနိုင်ငံ တိုင်းရင်းသားလူမျိုးများ၏ လူမှုဘ၀ဖူလုံရေး အတွက်ကူညီဆောင်ရွက်ပေးရန် သံတမန်အဖြစ်တင်မြှောက်ထားသည်။

ထို့အပြင် UNFC နှင့် အစိုးရတို့ မတွေ့ဆုံမီ ၁ ရက်အလိုဖြစ်သော ဖေဖော် ဝါရီလ ၁၉ ရက်ကလည်း ဂျပန်နိုင်ငံ ဝန်ကြီး ချုပ်သစ် ရှင်းဇိုးအားဘေး က လည်း ယိုဟေးအိ ဆာဆာကာဝါ အား မြန်မာနိုင်ငံ၏ အမျိုးသားရင်ကြားစေ့ရေး အတွက် ဂျပန်နိုင်ငံအစိုးရ၏ အထူးသံတမန် အဖြစ် ထပ်မံအပ်နှင်းခဲ့သေးသည်ဟုလည်း သိရပါသည်။


No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။