Tuesday, January 1, 2013

နှစ်သစ်ကူးအကြို အထူးသတင်း KIA နှင့် စစ်တပ် ထိပ်တိုက် တွေ့ကြတော့မည်

(စည်းလုံးခြင်းရဲ့အင်အား)

လိုင်ဇာဒေသဧရိယာ အတွင်းသို့ ပစ်ခတ် ဗုံးကြဲခဲ့တဲ့ လေတပ်အခြေစိုက်စခန်း ဌာနချုပ်တစ်ခုအတွင်းရှိ K-8 အမောင်းသင်လေယာဉ်
(ပေးပို့သူ: ပြည်တွင်းမှ တာဝန် ထမ်းဆောင်ဆဲ လေတပ်အရာရှိတစ်ဦးအား အထူးကျေးဇူးတင်ရှိပါသည်။)

စည်းလုံးခြင်းရဲ့အင်အား ဝက်ဘ်ဆိုဒ်အနေဖြင့် ၂၀၁၂ ခုနှစ် နှစ်ဆန်းပိုင်း နှစ်သစ်ကူးတုန်းတွင် KIA ဗဟိုဌာနချုပ် လိုင်ဇာသို့ ချီတက်တိုက်ခိုက်မဲ့ ကက(ကြည်း) စစ်ဆင်ရေး စီမံချက် ရေးဆွဲထားခဲ့ပြီး ဖြစ်ကြောင်း၊ ၂၀၁၂ ခုနှစ် ဇန်နဝါရီလ (၁) ရက်နေ့မှာ အထူးသတင်းအဖြစ် စည်းလုံးခြင်းရဲ့အင်အား ဝက်ဘ်ဆိုဒ်မှာ တင်ပြသွားခဲ့ပြီး ဖြစ်ပါတယ်။ အဲ့ဒီသတင်းမှာ အမြောက်ပစ်ကူ၊ လေကြောင်းပစ်ကူများ ပါရှိပြီး အဓိက စစ်ကြောင်းမှာ သံချပ်ကာယာဉ်များကိုပင် လိုအပ်က အသုံးပြုသွားမှာဖြစ်ကြောင်း ဖော်ပြခဲ့ပြီးဖြစ်ပါတယ်။ အဆိုပါသတင်း တင်ပြခဲ့တဲ့ အပေါ်အချို့သတင်းဌာနများက “မဖြစ်နိုင်” ဟု သုံးသပ်ကြပေမယ့် ယခုအခါ စစ်ဆင်ရေးစီမံချက်ကို စတင် အကောင်အထည်ဖော်နေပြီ ဖြစ်ပါတယ်။ 
အဆိုပါ စစ်ဆင်ရေး စီမံချက် အထူးသတင်းကို ပြန်လည် လေ့လာဖတ်ရှုလိုပါရင် 
K.I.A ကို တိုက်ခိုက်ချေမှုန်းမဲ့ စစ်ဆင်ရေး စီမံချက် ရေးဆွဲထားပြီးဖြစ် နှစ်သစ်ကူး အထူးသတင်း  


ကြိုတင်ပြင်ဆင်မှု စီမံချက်အရ အမြောက်တပ်စခန်းများ ဖြစ်ကြတဲ့ ဘွမ်ဆောမ် တပ်စခန်း၊ မန်တဲ တပ်စခန်း၊ ဒေါ့ဖုန်းယန် တပ်စခန်း၊ ခန်းကိုင်တောင်တပ်စခန်း တို့မှာ ဟောင်ဝစ်ဇာ (၁၀၅) မမ အမြောက်များ နှင့် (၁၂၀) မမ စိန်ပြောင်းကြီးများ ခြေကုတ်ယူပြီး လိုင်ဇာဒေသဧရိယာကို ချိန်ရွယ်ထားပြီးဖြစ်ပါတယ်။ ဒီဇင်ဘာလ (၂၅) ရက်၊ မနက် (၁၁) နာရီအချိန်မှ ညနေ (၄) နာရီအထိ ဒေါ့ဖုန်းယန်၊ ခန်းကိုင်တောင် အမြောက်တပ်စခန်းများမှ (၁၀၅) မမ ဟောင်ဝစ်ဇာ အမြောက်များဖြင့် လဂျားယန်ဘက်သို့ အကြိမ် (၂၀) ကျော်ပစ်ခတ်ခဲ့တယ်လို့ သိရပါတယ်။ ဒီဇင်ဘာလ (၂၆) ရက်မှာ အဆိုပါ အမြောက်စခန်းများမှ KIA တပ်မဟာ (၅) နှင့် လဂျားယန်ဘက်သို့ စဉ်ဆက်မပြတ် ပစ်ခတ်နေပြီး လမ်းကြောင်းများ၊ တောင်ကုန်းများ၊ စခန်းများ စသည့်နေရာများကို ပစ်မှတ် မှတ်ပုံတင် ပစ်ကွင်းရှာနေကြောင်း စစ်ဖက်နီးစပ်သူများထံမှ သိရှိရပါတယ်။


မှတ်တိုင်(၆) ဒဘူဘွမ် ကချင်စစ်ပြေး ဒုက္ခသည် စခန်း

ယခုအခါ မပခတိုင်း စစ်ဌာနချုပ်လက်အောက်ခံ ခြေလျင်တပ်ရင်းများ ဖြစ်ကြတဲ့ ခမရ (၄၃၈)၊ ခမရ (၃၈၇)၊ ခမရ (၃၂၀)၊ ခမရ (၄၃၇)၊ ခမရ (၆၀၁)၊ ခမရ (၃၁၉)၊ ခလရ (၁၄၂)၊ ခလရ (၂၃၆)၊ ခလရ (၂၁)၊ ခလရ (၄၇)၊ ခလရ (၄၁) တပ် တွေဟာ KIA ရှေ့ကာကင်းစခန်းများ၊ စစ်ကြောင်းများကို ရင်ဆိုင် ထိန်းချုပ်ထားပြီး၊ လိုင်ဇာဌာနချုပ်ကိုတော့ အဓိက စစ်ကြောင်းများအဖြစ် တပ်မတပ်များက ထိုးစစ်ဆင်ရန် ရည်ရွယ်ထားပါတယ်။ ပန်းဝါဒေသမှာ တပ်မ (၈၈) လက်အောက်ခံ ခလရ (၁၀)၊ ခလရ (၁၃)၊ ခလရ (၇၇) တပ်ရင်း သုံးရင်း ရောက်ရှိနေကြောင်း သိရှိရပါတယ်။ မြေပြင် စစ်ဆင်ရေး အခင်းအကျင်းအရ တပ်မတော် စစ်ကြောင်းများနှင့် KIA စစ်ကြောင်းတပ်များဟာ လက်ယှက်ထိုး ရှုပ်ထွေးနေပြီး L of C ဆိုတဲ့ လမ်းကြောင်းပိတ်ဆို့မှု ပြတ်တောက်မှုတွေ ကြုံတွေ့နေရပါတယ်။ လဂျားယန် အရှေ့ဘက်ရှိ တပ်မတော် စစ်ကြောင်းများကို နောက်တန်းဌာနချုပ်မှ ရိက္ခာပို့မည့် လမ်းကြောင်း L of C တွင် လဂျားယန် KIA နှင့် ABSDF စခန်းနှစ်ခုက ခွထိုင်ထားသလို ဖြစ်နေပြီး ပိတ်ဆို့တဲ့ ပုံစံမျိုးဖြစ်နေတာကို တွေ့ရှိရပါတယ်။ အလားတူ လိုင်ဇာဌာနချုပ်ရဲ့ ရှေ့ကာကင်းစခန်းများအနက် လဂျားယန်စခန်းဟာ အချက်အချာကျသော စခန်းတစ်ခုဖြစ် နေပါတယ်။ ဒါကြောင့် လဂျားယန် ဒေသလွှမ်းမိုးနိုင်ရန် အတွက် ရှေ့မတိုးသာ နောက်မဆုတ်သာ ဖြစ်နေတဲ့ KIA နှင့် စစ်တပ် တို့အဖို့ နှစ်ဖက်စလုံး အကြပ်အတည်းနဲ့ ကြုံတွေ့နေရပါတယ်။



မြောက်ပိုင်းတိုင်း စစ်ဌာနချုပ်တိုင်းမှူး ဗိုလ်မှူးချုပ် ထွန်းထွန်းနောင်မှ လဂျားယန်တစ်လျှောက်ရှိ KIA တပ်ဖွဲ့များကို ဒီဇင်ဘာလ ၂၅ရက်နေ့ နောက်ဆုံးထားပြီး ဖယ်ရှားရန် ငြိမ်းချမ်းရေး အကျိုးတော်ဆောင်မှ တဆင့် အကြောင်းကြားခဲ့ပါတယ်။ ရှေ့တန်းတပ်များသို့ ရိက္ခာပို့ရန် ရည်ရွယ်သည်ဟု ဆိုသော်လည်း KIA က ရာဇသံပေးသည်ဟု ယူဆပြီး ကန့်ကွက်ခဲ့ပါတယ်။ စစ်ဖက်နီးစပ်သူများကတော့ စစ်တပ်အနေနဲ့ စတင်တိုက်ခိုက်တဲ့ ပုံစံမျိုးမရောက်အောင် အဲ့ဒီလို KIA တပ်တွေကို ဖယ်ရှားခိုင်းတာဟာ ကြိုတင်ကာကွယ်ခြင်းလို့ ယူဆကြပါတယ်။ KIA ကမဖယ်ရှားတဲ့အတွက် စစ်တပ်က တာဝန်ကျေပြီး မလွှဲမရှောင်သာလို့သာ ထိုးစစ်ဆင်တိုက်ရတဲ့ အနေအထားမျိုး ဖန်တီးသွားတာဖြစ်တယ်လို့ ဆိုပါတယ်။



ဒါကြောင့် လိုင်ဇာမြို့ စစ်ဌာနချုပ်ရဲ့ ရှေ့ခံစစ်စည်းဖြစ်တဲ့ လဂျားယန် KIA စခန်းနှင့် ABSDF စခန်းတို့ကို တပ်မတော်မှ ဒီဇင်ဘာ (၂၈) ရက်နေ့တွင် စတင်တိုက်ခိုက်ခဲ့ပါတယ်။ ဒီဇင်ဘာ (၂၈)ရက်နေ့ နံနက်လင်းအားကြီးအချိန်တွင် အမြောက်တပ်စခန်းမှ အမြောက်များဖြင့် စတင်ပစ်ခတ်ခဲ့ပြီး နံနက် (၉) နာရီခန့်မှာ တပ်မတော်(လေ)မှ အမောင်းသင်လေယာဉ် နှစ်စင်းဖြင့် လဂျားယန်ဒေသ KIA နှင့် ABSDF စခန်းများကို Rocket နှင့်ပစ်ပြီး ဗုံးများကြဲချခဲ့တယ်လို့ သိရပါတယ်။ ဒါ့အပြင် ရုရှားလုပ် (MI-24) ရဟတ်ယာဉ်များဖြင့်လည်း ထပ်မံတိုက်ခိုက်ခဲ့တယ်လို့ သိရပါတယ်။ နိုင်ငံတကာက ထောက်ကွက်ဖြစ်မှာ စိုးတာရယ်၊ တရုတ်နိုင်ငံအစိုးရနှင့် ညှိုနှိုင်းခဲ့ရာမှာ နှစ်နိုင်ငံနယ်စပ်တွင် ဖြစ်နေလို့ ချစ်ကြည်ရေးထောက်ထားလိုသဖြင့် အမောင်းသင်လေယာဉ်များ (K-8) ကိုသာ စမ်းသပ်စတင်အသုံးပြုခဲ့တာ ဖြစ်တယ်လို့ စစ်ရုံးနှင့်နီးစပ်သူများက ဆိုပါတယ်။ အမောင်းသင်လေယာဉ် တစ်စင်းမှာ အနီရောင်ဖြစ်ပြီး၊ နောက်တစ်စင်းမှာ အဖြူရောင် ဖြစ်ပါတယ်။


တိုက်ပွဲ သတင်းရလဒ်ကို KIA နှင့် နီးစပ်သူများထံ ဤဝက်ဘ်ဆိုဒ် မှ မေးမြန်းခဲ့ပါတယ်။



"အဲ့ဒီလေယာဉ် နှစ်စင်းအနက် ရှေ့တစ်စင်းက Rocket နှင့် အရင် ပစ်ပြီး နောက်တစ်စင်းက ဗုံးကြဲပါတယ်။ ပြီးတာနဲ့ အဲ့ဒီလေယာဉ်နှစ်စင်းက လိုင်ဇာ ဘက်သို့ ဆက်လက် ဦးတည် သွားပြီး လိုင်ဇာရှေ့တောင်ကုန်းစခန်း (Alen Bun) အား Rocket ဖြင့် ဆက်ပစ်သွားပါတယ်။ အဲ့ဒီနောက် လိုင်ဇာမြို့ကို ဝဲပျံပြီး ပြန်ထွက်သွားပါတယ်။ ရဟတ်ယာဉ် နှစ်စင်းလည်း နေ့လည် ပိုင်းလောက်မှာ ဆက်တိုက်လာပြီး လဂျားယန် စခန်းကို ပစ်ခတ်သွားပါတယ်။ KIA စခန်းမှ စစ်သည် (၂) ဦး ဒဏ်ရာ ရရှိသွားတယ်လို့ သိရပါတယ်။ စစ်တပ်က ခြေလျင်တပ်များ ချီတက်လာပြီး ထိတွေ့မှု တိုက်ပွဲတွေ စတင်လာပြီလို့ သိရပါတယ်။"



ဒီဝက်ဘ်ဆိုဒ်ရဲ့ အယ်ဒီတာအဖွဲ့အနေဖြင့် ဒုက္ခသည်စခန်းကို ဆက်သွယ်မေးမြန်းစုံစမ်းကြည့်ရာ ဒုက္ခသည်တစ်ဦးမှ ရင်ဖွင့်လာပါတယ်။



“ဒီနေ့ (၂၈) ရက်နေ့မှာလည်း လေယာဉ် (၄) စီးဖြင့် လဂျားယန်ဒေသစခန်းတွေကို လာပစ်တယ်ဗျ၊ လိုင်ဇာမြို့ကို ဦးတည်လာတယ်လို့ ထင်တာကြောင့် ဗုံးခိုကျင်း အမြန်တူးလိုက်ရတယ်။ လေယာဉ် (၄) စီး ဆိုပေမည့် ကျွန်တော်တို့ တွေ့လိုက်တာကတော့ စစ်အရောင်မဟုတ်ပဲ၊ လေယာဉ်ဝမ်းဗိုက်မှာတော့ အနီယောင် မြင်လိုက်ရတာပဲ။ ကျွန်တော့် ညီမလေး (၂) ယောက်နှင့် သူငယ်ချင်း (၆) ယောက် တောင်မှ ကတုတ်ကျင်းမှာ ပုန်းနေတာ ကျွန်တော်ဖုန်းဆက်တဲ့ အချိန်မှာပဲ ညီလေးက လာခေါ်သွားပြီး ကတုတ်ကျင်းမှာ မနေရဲတော့ဘဲ တောထဲမှာ ပုန်းနေရတယ်ဗျာ။”



KIA အား တပ်မတော်မှ စစ်ဆင်ရေးစီမံချက် အပြည့်အဝ အကောင်အထည်ဖော်နိုင်မည့် အခြေအနေဖန်တီးမှု အလားအလာနဲ့ တိုက်ပွဲ သတင်းများ ရရှိပါက အချိန်နှင့် တပြေးညီ ဆက်လက် တင်ပြသွားပါမယ်။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။