Friday, January 18, 2013

ကချင်စစ်ပြေးဒုက္ခသည်များကို တရုတ် ရဲတပ်ဖွဲ့ ဖမ်းဆီးစစ်ဆေးမှုရှိနေ

မဇ္ဈိမသတင်းဌာန


ရှမ်းပြည်နယ်၊ မူဆယ်မြို့နယ်အတွင်းမှ တရုတ်နိုင်ငံ သို့ ထွက်ပြေး ခိုလှုံနေထိုင်နေသော ကချင်စစ်ပြေး ဒုက္ခသည်အချို့ကို တရုတ် ရဲတပ်ဖွဲ့က ဖမ်းဆီး၍ စစ်ဆေးမေးမြန်းမှုများ ရှိနေကြောင်း သိရသည်။
မူဆယ်မြို့နယ်၊ ဝမ်ဒိန်ဂပ်နာ ကျေးရွာအုပ်စု ဖိုင်ကောင်ကျေးရွာမှ ရွာသား ၂၀၀ ကျော်သည် တရုတ်နိုင်ငံ၊ ယူနန်ပြည်နယ်၊ ရွှေလီမြို့နယ်၊ နောင်း လုန် ကျေးရွာမှ ကချင်ခရစ်ယာန် နှစ်ခြင်းအသင်းတော် ကျောင်းဝင်း အတွင်း ခိုလှုံနေရာ ၎င်းတို့အနက် ၁၂ ဦးကို ဇန်နဝါရီလ ၁၅ ရက်နေ့က ထိုကျေးရွာမှ တရုတ် ရဲတပ်ဖွဲ့ဝင်များက လက်ထိတ် ခတ်၍ ဖမ်းဆီး မေးမြန်းခဲ့ခြင်း ဖြစ်သည်။

“တနေ့က တချို့ အိပ်ယာတောင် မထသေးဘူး။ မထသေးတဲ့ လူတွေကို ကန်ပြီး ထခိုင်းပြီးတော့ နှစ်ယောက်တတွဲ လက်ထိပ်ခတ်ပြီး သူတို့ စခန်း ထဲကို ခေါ်သွားတယ်။ ဟိုမှာ ၂ နာရီလောက် ထိုင်ထားခိုင်းပြီး မူးယစ် ဆေးဝါးနဲ့ ပတ်သက်ပြီး စစ်ဆေးမေးမြန်းတယ်။ ကျနော်တို့ ပြောင်းဖို့ တခြားနေရာ မရှိတော့ဘူး။
ရွာကို ပြန်မယ်ဆိုလည်း အစိုးရ စစ်ကြောင်း က ရှိနေတယ်” ဟု ၎င်းရွာသားက ပြောသည်။

ထိုသို့ စစ်ဆေးမေးမြန်းစဉ် ရွာသားများအား တိုက်ပွဲများ မရှိတော့သဖြင့် ကိုယ့်ရွာကို ပြန်ရန် ပြောဆိုမှုများ ရှိသဖြင့် မူးယစ်ဆေးဝါး စစ်ဆေးမှု အကြောင်းပြ၍ ၎င်းတို့အား နှင်ထုတ်ခြင်း ဖြစ်နိုင်သည်ဟု သူက မဇ္စျိမကို ပြောသည်။

ကချင်ရွာသူကြီးများက ပြန်လည် ခေါ်ယူခဲ့ရာမှ တရုတ်ရဲတပ်ဖွဲ့က ၎င်းတို့ အား ပြန်လွှတ်ပေးလိုက်သည်ဟု သူက မဇ္စျိမကို ပြောသည်။

အဆိုပါ ဖိုင်ကောင်ကျေးရွာသားများမှာ တိုက်ပွဲ ဖြစ်ပွားလာပါက ထွက် ပြေး ခိုလှုံရန် ရွာအနီး လယ်ကွင်းများအတွင်း ပိုင်ဆိုင်သော စပါးများကို သိမ်းဆည်းထားသည့် စခန်းငယ် ၂၀ ခန့်အား အစိုးရ တပ်ဖွဲ့က ၂၀၁၂ ခုနှစ်၊ နိုဝင်ဘာလ ၂၈ ရက်နေ့တွင် မီးရှို့လိုက်သဖြင့် ဒီဇင်ဘာ လဆန်း တွင် တရုတ်နိုင်ငံသို့ သွားရောက် ခိုလှုံနေခြင်း ဖြစ်သည်ဟု သိရသည်။

ထိုသို့ မီးရှို့ဖျက်ဆီးသည့်နေ့က ၎င်းကျေးရွာမှ ဆယ်အိမ်မှူး အပါအဝင် အမျိုးသား ၂၀ ကျော်အား အစိုးရစစ်တပ်က ဘုရားကျောင်းအတွင်း ချုပ်နှောင်ထားခြင်းများ ပြုခဲ့ဖူး၍ ရွာသားများ မိမိနေရပ်သို့ ပြန်ရန် စိုးရိမ်မှုများ ရှိနေသည်ဟု ထိုရွာသားက ပြောသည်။

ဖိုင်ကောင်ကျေးရွာတွင် အိမ်ခြေ ၆၀ ခန့်ရှိပြီး တချို့မှာ မိမိကျေးရွာတွင် ကျန်ရစ်ကာ ၂၀၀ ကျော်မှာ တရုတ်နိုင်ငံ၊ နောင်းလုန် ကျေးရွာသို့ သွားရောက် ခုိုလှုံနေရာမှ ယခုကဲ့သို့ ဖမ်းဆီးစစ်ဆေးခြင်း ခံနေရခြင်း ဖြစ်သည်။


No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။