Saturday, January 5, 2013

ကချင်=ဗမာ သမိုင်း (အပိုင်း-၄)

(ကိုဝိုင် FB မှ)


ကေအိုင်အို၊ကေအိုင်အေ ပေါ်ထွက်လာခြင်း။


ကေအိုင်အို၊ ကေအိုင်အေ ပေါ်ထွက်လာခြင်း အကြောင်းအရင်းနှင့်ပတ်သက်၍ ရှေ့မှီနောက်မှီပုဂ္ဂိုလ်ကြီးများ၊ ကချင် ခေါင်းဆောင်ကြီးများနှင့် နိုင်ငံရေးနယ်ပယ်မှ တိုင်းပြည်၏ အခြေအနေကို ကောင်းစွာသိရှိသော ပုဂ္ဂိုလ်များနှင့် ပြောကြား ချက်များကို လေ့လာကြည့်နိုင်ပါသည်။ အဓိကသိရှိရသည်မှာ ကချင်တော်လှန်ရေး ပေါ်ပေါက်လာခြင်း၏ အခြေခံ အကြောင်းတရားမှာ နိုင်ငံရေးပြဿနာကြောင့် ဟူသည်ပင်ဖြစ်သည်။ သေချာသည့် အကြောင်းတစ်ခုမှာလည်း လူမျိုးရေး ပြဿနာကြောင့် မဟုတ်ဘူး ဆိုတာပင် ဖြစ်သည်။ ကချင် လူမျိုးများသည် သမိုင်းရှေ့ပိုင်းတစ်လျှောက်လုံး မိမိနယ်မြေ၊မိမိ ယဉ်ကျေးမှုနှင့် သီးခြားနေထိုင်ခဲ့ကြပြီး ဗမာဘုရင်များ၏ လက်အောက်ခံ မဟုတ်ခဲ့သည်ကို သတိပြုရပါမည်။


လွတ်လပ်ရေး ရရှိရန် ဗြိတိသျှတို့၏ (မဖြစ်နိုင်ဟု ထင်မြင်ပုံရခဲ့) တောင်းဆိုချက်ကြောင့်
ပြည်မနှင့်တောင်တန်းဒေသ တစ်ပြိုင်တည်း ရယူနိုင်ရေးကြောင့် လည်ကောင်း၊ ဗိုလ်ချုပ်အောင်ဆန်းအပေါ် လေးစားယုံကြည်မှုကြောင့်လည်းကောင်း၊
သီးခြားနေခဲ့လျှင် လွတ်လပ်ရေးရရန် မည်မျှအချိန်ကြာဦးမည်ကို မမျှော်မှန်းနိုင်၍ လည်းကောင်း၊
ထိုစဉ်က ဗိုလ်ချုပ် အောင်ဆန်း သက်ရှိထင်ရှား ရှိနေချိန်ဖြစ်ပြီး ဂတိကဝတ်များကို ယုံကြည်နှစ်သက်၍ လည်းကောင်း၊
အထူးသဖြင့် အနာဂါတ်ကာလတွင် ဗိုလ်ချုပ်ကျဆုံးခြင်း၊ မျှော်မှန်းယုံကြည်မှုများ အကောင်အထည်ပေါ်မလာခြင်း၊ နှင့်အတူ
ထိုအချိန်က စ၍ ပြည်ထောင်စု အစိုးရနှင့် နိုင်ငံရေးပြဿနာများကြောင့် ယနေ့ထိ ကချင်တော်လှန်ရေးကို ဆောင်ရွက်နေကြသော ကေအိုင်အို၊ ကေအိုင်အေ ဆိုသည် ကချင်အဖွဲ့အစည်းများ ပေါ်ထွန်းလာခြင်း ဖြစ်သည်။

ကချင်လူမျိုးများသည် ဗမာအပါအဝင်အခြားတိုင်းရင်းသားတို့နှင်ပါ သင့်မြတ်ချစ်ခင်နေခဲ့ပြီး နယ်ချဲ့ခေတ် ကာလများကို လက်တွဲ၍ တိုက်ပွဲဝင်ခဲ့ကြသော လူမျိုးများဖြစ်သည်။ ရှေးယခင် ဗမာမင်းဘုရင်များ လက်ထက် များတွင် ( ဗမာဘုရင်၏ လက်အောက်သြဇာခံများ မဟုတ်ခဲ့ပဲ ) သီးခြားရပ်တည်နေခဲ့သော ကချင်ဒူဝါ အများအပြား၏ ကချင်ဒေသ နှင့် ကချင်လူမျိုး တို့သည် ဗမာဘုရင်များနှင့် မဟာမိတ်ဖွဲ့ခြင်း၊ လက်ဆောင်ပဏ္ဍာ၊ သမီး-ကညာလဲလှယ်ခြင်း တို့ဖြင့် ချစ်ကြည်စွာ နေထိုင်ခဲ့ကြသူများဖြစ်သည်။
ထင်ရှား၍ယနေ့တိုင် သက်သေ ပြုနိုင်သော သမိုင်းသာဓက တစ်ခုပြရလျှင် ဗမာဘုရင်များသည် တရုတ်နှင့် စစ်ခင်းနေသည့်ကာလက ကချင်တို့ နေထိုင်ရာ မြစ်ကြီးနားမြို့အနီးရှိ မန်ခိန်း (Man Hkring) ကျေးရွာ၌ ခေတ္တစခန်းချ နေထိုင်ခဲ့ကြသည်။ ထိုရွာ၏ မန်ခိန်း ဆိုသော အမည်ကိုက Man ဆိုသည်မှာ ဗမာလူမျိုးကို ခေါ်ဆိုပြီး Hkring ဆိုသည်မှာ ရပ်နားခြင်း ဟူ၍ မှည့်ခေါ်ခဲ့သည်မှာ ယနေ့တိုင် ဖြစ်သည်။
ထိုအချိန် ကတည်းက ဗမာနှင့် ကချင်သည် ရင်းရင်း နှီးနှီး ဆက်ဆံနေထိုင်ခဲ့ပြီး လိုအပ်သောအကူအညီများ ပေးခဲ့ကြသည်ကို တွေ့မြင် နိုင်သည်။ ၎င်းအပြင် ဗိုလ်ချုပ်အောင်ဆန်းကလည်း ကချင်+ဗမာ ချစ်ကြည်ရေး ကို ခိုင်မာအောင် တည်ဆောက် ပေးခဲ့ပြီး ဖြစ်သည်။

ဤသည်တို့ကို ထောက်ရှုလျှင် ကချင်တော်လှန်ရေးသမိုင်းသည် လူမျိုးရေးပြဿနာကို အခြေခံ၍ ပေါ်ထွက်လာ ခြင်း မဟုတ်ကြောင်း၊ နိုင်ငံရေးပြဿနာတို့ကြောင့်သာ ပေါ်ပေါက်လာခြင်း ဖြစ်ကြောင်း ထင်ရှားပါသည်။

နိုင်ငံရေးပြဿနာ ဆိုရာတွင် လွတ်လပ်ရေးရပြီးနောက်ပိုင်းတွင် သမ္မကြီးကိုယ်တိုင် ကချင်ပြည်နယ် ဟူသော သီးခြားရပ်တည်ခွင့်-ပြုခဲ့ကြောင်း ရှေ့စာမျက်နှာတွင် ဖော်ပြခဲ့ပြီးဖြစ်သည်။ သို့သော် ပြည်ထောင်စု အစိုးရ အတွင်း အပြောင်းအလဲများ၊ အခြား တိုင်းရင်းသားလက်နက်ကိုင်များ နှင့် ပြည်တွင်း မငြိမ်သက်မှုများ ဖြစ်ပေါ် လာပြီးနောက်ပိုင်းမှ စ၍ တိုင်းရင်းသားတို့နှင့် ပြည်ထောင်စု အစိုးရလက်ထက်၊ အာဏာသိမ်းပြီးနောက် မြန်မာ့ဆိုရှယ်လစ် လမ်းစဉ်ပါတီခေတ် လက်ထက် စသည်နှင့် ထိုစဉ် မှ ယနေ့တိုင် နိုင်ငံရေးပြဿနာများ မဖြေရှင်းနိုင်သည့်အပြင် အပြိုင် အဆိုင် အောင်နိုင်ရေး ကြိုးပမ်းမှုများကြောင့် စစ်ဖြစ်ပွားရာဒေသများတွင် ဗမာဟုကြားလျှင် စစ်သားဟု တထစ်ချ မှတ်ယူသည် အစွဲများ ဖြစ်ပေါ်လျှက် ပြည်တွင်းက ဗမာတွေ သည်ပင်လျှင် ထိုသို့ဟူ၍ ထင်မှတ် ခံခဲ့ရသည် အထိ လူမျိုးရေးသံသယများ ယှက်နွယ်လာခဲ့သည်။

ထိုသို့ထင်မှတ်မှု မှာ မမှန်ကြောင်း တက္ကသိုလ် တက်ရောက်ခွင့် ရရှိခဲ့သည် ကချင် အပါအဝင် တိုင်းရင်းသား ကျောင်းသား အများအပြားသည် သိမြင်ခဲ့၍ နိုင်ငံရေးစင်မြင့်ထက်တွင် (၎င်းတို့မှပြည်မဟုခေါ်သော ကျောင်းသား များနှင့် )လက်တွဲ၍ ဆောင်ရွက်ခဲ့ကြသည်။ ထိုကြောင့် မြန်မာပြည်တွင် ပထမဆုံး သေဒါဏ်ချမှတ်ခံရသော ကျောင်းသား ဖြစ်သည့် ချင်းတိုင်းရင်းသား ဆလိုင်း တင်မောင်ဦး အပါအဝင် အခြား တိုင်းရင်းသား ကျောင်းသား ခေါင်းဆောင်၊ ခေါင်းဆောင်လောင်းများကို ပြင်းပြင်း ထန်ထန် နှိပ်ကွက်ခဲ့သည်။ နိုင်ငံရေးပြဿနာ နှင့်ပတ်သက်၍ ရှင်းပြရလျှင် ပြည်ထောင်စုအစိုးရက ကချင်ပြည်နယ်အပေါ် နိုင်ငံရေး အရ ဖိနှိပ်ခြင်း၊ စီးပွားရေး အရ လက်ဝါးကြီးအုပ်ခြင်း၊ လူမှုရေးအရ ဥပက္ခောပြုခြင်း၊ တိုင်းရင်းသားများကို ခွဲခြားဆက်ဆံခြင်း၊ တန်းတူ အခွင့်အရေး မပေးခြင်း နှင့် တိုင်းရင်းသားတို့၏ စာပေနှင့်ယဉ်ကျေးမှုများကို လွတ်လွတ် လပ်လပ် ထိန်းသိမ်း မြှင့်တင်ခွင့် မရရှိခြင်း စသည်တို့သည် ကချင်အမျိုးသားတော်လှန်ရေး ပေါ်ပေါက်လာအောင် အဓိက မီးမွှေးပေးလိုက်သော အကြောင်းအရာများ ဖြစ်သည်။
 ထို့အပြင် ဗူးလေးရာဖရုံဆင့်ဆိုသည့်နှယ်  ထိုစဉ်ကဝန်ကြီးချုပ်ဖြစ်သူ ဦးနုက ကချင်ပြည်နယ်၏ အစိတ်အပိုင်းများဖြစ်သော တရုတ်နယ်စပ်ဒေသရှိ ဖီမော်ရွာ၊ ဂေါ့လန်ရွာ၊ ကမ်ဖန်ရွာ စသည့် ရွာ(၃)ရွာကို တရုတ်ပြည်အစိုးရအား လွဲအပ် ပေးလိုက်ခြင်းသည် ကချင်တော်လှန်ရေး အတွက် တွန်းအားပေး သလိုဖြစ်ခဲ့ပေသည်။

လွတ်လပ်ရေးရပြီးနောက်ပိုင်း တိုင်းပြည်ကို ပြည်ထောင်စုဟု ခေါ်တွင်သော်လည်း တစ်ပြည်ထောင်စနစ်သာ ဖြစ်ခဲ့သည်။ ပြည်ထောင်စုစနစ်ဆိုရာ၌ အာဏာမဏ္ဍိုင်(၃)ရပ်ဖြစ်သော
(၁) ဥပဒေပြု အာဏာ၊
(၂) အုပ်ချုပ်မှု အာဏာ၊
(၃)တရားစီးရင်ရေး အာဏာ တို့ ရှိပြီး စနစ်တကျ အာဏာခွဲဝေခြင်း လည်းရှိရမည် ဖြစ်သည်။

သို့သော် ၁၉၄၇-ခုနှစ် အခြေခံဥပဒေ၌မူ အာဏာပိုင်းခြား သတ်မှတ်ထားခြင်းပါရှိသော်လည်း အာဏာခွဲဝေ ကျင့်သုံးခြင်းအပိုင်း၌ မျှတမှု မရှိသည်ကို တွေ့ရပေမည်။ ဥပဒေပြုအာဏာကို ဗဟို၌သာ ထားရှိပြီး ပြည်နယ်များ သို့ ခွဲဝေပေးထားခြင်းမရှိပါ။ ဖဆပလ ပါလီမန်အစိုးရခေတ်တွင် ပြည်နယ်များ၌ ဥပဒေပြုလွတ်တော်မရှိခဲ့သဖြင့် ဥပဒေပြုခွင့်မရရှိခဲ့ပေ။ အုပ်ချုပ်ရေး ကဏ္ဍ၌ လည်း ဗဟိုအစိုးရသည် တင်းကျပ်သော ဗဟိုချုပ်ကိုင်မှု ပုံစံ (Tight Centralism) ကို ကျင့်သုံးပြီး ပြည်နယ်များ၏ အုပ်ချုပ်မှု အာဏာကို လက်ဝါးကြီး အုပ်ခဲ့ပေသည်။ ထိုကြောင့် ပြည်နယ် အစိုးရသည် စိတ်တိုင်းကျ လွတ်လပ်စွာ စီမံခွင့်၊ အုပ်ချုပ်ခွင့် မရရှိသောကြောင့် ပြည်နယ်များသည် ဖွဲ့ဖြိုးတိုးတက်မှုနှုန်းသည် အင်မတန်မှ နိမ့်ကျခဲ့ရသည်။

ဤသို့ဖြင့် ဗဟိုအစိုးရသည် ပြည်နယ်များကို နိုင်ငံရေးအရ ဖိနှိပ်ခြင်း၊ စီးပွားရေးအရ လက်ဝါးကြီးအုပ်ခြင်း၊ လူမှုရေးအရ လစ်လျုရှုခြင်း၊ ကျန်းမာရေးနှင့် ပညာရေး ကဏ္ဍများ၌ အခြေခံလိုအပ်ချက်များကိုပင် လုံလောက်အောင် ဆောင်ကျဉ်း ပေးနိုင်မှု မရှိခြင်း၊ တိုင်းရင်သားများ၏ စာပေနှင့်ယဉ်ကျေးမှုကို ကန့်သတ်ထားခြင်းများ စသည် တို့ကြောင့် ကချင်ပြည်နယ် အပါအဝင် ပြည်နယ်များတွင် ဒီမိုကရေစီစနစ်ကို ပီပြင်အောင် ဖော်ဆောင်ခွင့် မရခဲ့ပေ။အခြားသော အခြေခံကျသည့် ဒီမိုကရေစီ အခွင့်အရေးများမှာလည်း ကန့်သတ်ခံရမှုများရှိခဲ့သည်။ နိုင်ငံရေးပါတီ တစ်ရပ်သည် ရွေးကောက်ပွဲ၌ အနိုင် ရရှိသော်လည်း ပြည်ထောင်စုအစိုးရဝန်ကြီးချုပ်ဦးနု၏ ထောက်ခံမှုမရရှိလျှင် ပြည်နယ်အစိုးရကို မဖွဲ့စည်းနိုင်ပါ။ ဝန်ကြီးချုပ်က နှစ်သက်သော ပါတီဥက္ကဌကိုပဲ ပြည်နယ်ကောင်စီဥက္ကဌ ခန့်ပြီး အစိုးရဖွဲ့စေသော အဖြစ်အပျက်များ ရှိခဲ့ပါသည်။ စီးပွားရေးကဏ္ဍတွင် ဗဟိုအစိုးရက နှစ်စဉ်နှစ်တိုင်း လိုအပ်သောဘဏ္ဍာငွေထောက်ပံ့ရန် မူချမှတ် ထားသော်လည်း လက်တွေ့အကောင်အထည် မဖော်နိုင်ခဲ့ပေ။

ထို့ကြောင့် ထိုစဉ်ကအစိုးရသည် ပြည်ထောင်စုအစိုးရ အမည်ခံ တစ်ပြည်ထောင်အစိုးရ ဟု ဆိုကြခြင်း ဖြစ်သည်။

ဆက်လက်ဖော်ပြပါမည်။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။