Friday, January 18, 2013

တရုတ်အတွက် မြန်မာနိုင်ငံ ပြဿနာ

(ဒေါန်းမာန်ဟုန်)

(17 January 2013 ရက်စွဲပါ the Diplomat မှ David Cohen ရေးသားသော China’s Myanmar Problem ကို ဘာသာပြန်ဆိုပါသည်)

နိုင်ငံခြားမှဝေဖန်သုံးသပ်သူများက ယုံကြည်နေသည်မှာ ကချင်ပြည်နယ်တွင် မြန်မာက စစ်ဆင်ရေးပြုလုပ်နေသည်မှာ အဆိုပြုထားသော ရေလှောင်တမံနေရာများကို ထိန်းချုပ်မှု ရရေးဖြစ်သည်ဟူသည့်အချက်ဖြစ်သည်။ ထိုရေလှောင်တမံများကို မြန်မာပြည်သူများက မလိုလားသော်လည်း တရုတ်နိုင်ငံပိုင်ကုမ္ပဏီများအတွက်မူ အရေးကြီးနေပါသည်။
မြန်မာနိုင်ငံတွင် အသစ်တဖန်ဖြစ်ပွားသော တိုက်ပွဲများသည် ပြီးခဲ့သည့်အပတ်က တရုတ်နယ်စပ်အနီးသို့ ရောက်ရှိလာကာ အိမ်နီးချင်း ယူနန်အစိုးရသည် သက်ရောက်မှုများကို ခံရတော့မည်ဟု တရုတ်မီဒီယာများက သတင်းဖော်ပြကြပါသည်။ ယူနန်တွင် စစ်တပ်များ နယ်စပ်သို့ ရွှေ့ပြောင်းထားရပြီး ကချင်သူပုန်များ ထိန်းချုပ်ထားရာဒေသမှ ဒုက္ခသည်များကို လက်ခံရန် ဒုက္ခသည်စခန်းများ ပြင်ဆင်ထားရပါသည်။


တရုတ်မြန်မာနယ်စပ်တွင် နှစ်နိုင်ငံမှလူများ နေ့စဉ်နယ်စပ်ဖြတ်ကျော်သွားလာနေကြသည်မှာ ပုံမှန်လိုဖြစ်နေသည်။ တရုတ်တွင် ယူနန်နယ်စပ်၌ ဒုက္ခသည်များနှင့်ပတ်သက်သောပြဿနာမှာ အကောင်းအဆိုးရောလျှက်ရှိပါသည်။ ၎င်းသည် ၂၀၀၉ ခုနှစ်က ကိုးကန့်ပြဿနာတွင် ဒုက္ခသည် ၃၇၀၀၀ ဦးအား နေရန်နေရာနှင့် စားစရာများ ဖြည့်ဆည်းပေးခြင်းကြောင့် ချီးကျူးမှု အသင့်အတင့်ရရှိခဲ့ပြီး နှစ်ဘက်စလုံးကို အပစ်အခတ်ရပ်ရေးအတွက် အောင်မြင်စွာ ဖိအားပေးခံခဲ့ရပါသည်။ သို့သော် ပြီးခဲ့သည့် နွေက Human Right Watch က စွပ်စွဲခဲ့ရာတွင် ကချင်ဒုက္ခသည်များကို တရုတ်က နှင်ထုတ်ကြောင်း စွပ်စွဲခဲ့ပါသည်။

ကိုးကန့်နှင့် ကချင်ပြဿနာများတွင် တရုတ်၏ ကိုင်တွယ်ပုံခြားနားရခြင်းမှာ အဘယ်အကြောင်းရင်းခံကြောင့်နည်း။ အဓိကအားဖြင့် ပြဿနာ အကြီးအသေးနှင့် ပဋိပက္ခများတွင် တရုတ်၏အကျိုးစီးပွားနှင့်ပတ်သက်သော ခံယူချက်များအပေါ် မူတည်နေပါသည်။ တရုတ်စကားကိုသာပြောသော ဝ နှင့် နယ်စပ်ခြင်းထိစပ်နေသော ကိုးကန့်သည် တရုတ်ကုန်သည်အများစု အခြေချနေထိုင်၍ မြန်မာနိုင်ငံနှင့် ကုန်သွယ်နေသည့်နေရာဖြစ်ပါသည်။ တရုတ်ကုန်ပစ္စည်းတော်တော်များများတင်ပို့ပြီး သစ်များ မှောင်ခို ဝယ်ယူပါသည်။ ၂၀၀၉ ခုနှစ်က ကိုးကန့် ပဋိပက္ခတွင် တရုတ်အမျိုးသားများ၏ အသက်အိုးအိမ်နှင့် စည်းစိမ်ကို ခြိမ်းခြောက်နေသည်ဟု တရုတ်က စိတ်အခန့်မသင့် ဖြစ်ခဲ့ပါသည်။

၂၀၀၉ ခုနှစ်က Drew Thompson ရေးသားသောဆောင်းပါးတွင် ကိုးကန့်ပြဿနာကို တရုတ်အမျိုးသား ဘလော့ဂါများက တရုတ်၏အားနည်းချက်ကို သရုပ်ဖော်သကဲ့သို့ဖြစ်ကြောင်း အဓိပ္ပာယ်ကောက်ကြပါသည်။ ၎င်းကို အငြင်းပွားနေသော နယ်မြေကိစ္စများနှင့် အမျိုးအစားတစ်ခုတည်းအဖြစ် သတ်မှတ်ကြပါသည်။ နယ်မြေပြဿနာများမှာ အလေးအနက်ထားရမည့် ပြည်တွင်းနိုင်ငံရေးအကျိုးဆက်များဖြစ်စေသည့် နိုင်ငံရေးမူဝါဒပင်ဖြစ်သည်။ (ပါတီက တရုတ်၏အင်အားမှာ တရားဝင်မှုအတွက် မူလအရင်းအမြစ်ဖြစ်ကြောင်း ရှုမြင်ပါသည်။) ကိုးကန့်အရေးအခင်းတွင် တရုတ်သည် ယခုပြည်တွင်းလုံခြုံရေးကြီးကြပ်သည့် ပါတီအကြီးအကဲဖြစ်နေသည့် ထိုစဉ်က နိုင်ငံတော်ကောင်စီဝင် Meng Jianzhu ကို ယူနန်သို့စေလွှတ်၍ ဒုက္ခသည်ကိစ္စတုန့်ပြန်ရေး ကိုင်တွယ်ဖြေရှင်းစေခဲ့ပါသည်။

ထိုကိစ္စနှင့်ဆန့်ကျင်စွာ ပြီးခဲ့သည့်နွေက ကချင်ဒုက္ခသည်ပြဿနာတွင် တရုတ်၌ ဒေသဆိုင်ရာအာဏာပိုင်များကသာ ကိုင်တွယ်ခဲ့ရာ ဤကိစ္စကို Beijing့  ဦးစားပေးအဆင့်နိမ့်သည်ဟု မှတ်ယူနိုင်ပါသည်။ နောက်ထပ်ရောက်လာဖွယ်ရှိသည့် ဒုက္ခသည်များအတွက် ပြင်ဆင်မှုများကိုလည်း ဒေသဆိုင်ရာအာဏာပိုင်များကသာ ကိုင်တွယ်ဖွယ်ရှိပါသည်။ တရုတ်သည် အနည်းဆုံးအားဖြင့် ဒုက္ခသည်များရောက်လာပါက နိုင်ငံတကာ၏ဝေဖန်မှုကို ရှောင်ရှားရန် ကြိုးပမ်းမည်ဟု စာရေးသူကမျှော်လင့်ပါသည်။ သို့သော်ဒုက္ခသည်စခန်းများတွင်လိုအပ်ချက်များပြည်စုံစွာ ဖြည့်ဆည်းပေးမည်လော ဆိုသည်ကိုမူ စောင့်ကြည့်ရဦးမည်ဖြစ်ပါသည်။

တရုတ်အစိုးရ၏ ထိပ်ပိုင်းအဆင့်တွင် ဒုက္ခသည်များလက်ခံရမည့်အရေးကို အလွန်အမင်းစိုးရိမ်လျှက်ရှိပါသည်။ Human Right Watch မှတရုတ်ဆိုင်ရာ ဌာနအကြီးအကဲ Sophie Richardson က စာရေးသူအားပြောပြရာတွင် တရုတ်က မြောက်ကိုရီးယားဒုက္ခသည်များကို အကူအညီများစွာပေးမိခြင်းကြောင့် ဒုက္ခသည်များပိုမိုဝင်ရောက်ရန် အားပေးသလိုဖြစ်မည်ကို စိုးရိမ်ကြောင်းဆိုပါသည်။ ယခုကိစ္စတွင်လည်း ဒုက္ခသည်များကိစ္စကို ဤနည်းအတိုင်းသာစဉ်းစားမည်ဖြစ်ပါသည်။

အထက်ပါအတိုင်းမစဉ်းစားဘဲ မဖြစ်နိုင်သည့်ကိစ္စတစ်ခုမှာ ယခုကချင်ကိစ္စအပေါ် တရုတ်ကအလေးအနက်စဉ်းစားရမည့် ကိစ္စအဖြစ် ခံယူခြင်းရှိမရှိပေါ်တွင် မူတည်ပါသည်။ ပြီးခဲ့သည့် ကြာသာပတေးနေ့က တရုတ်ပြည်မှ ကချင်များသည် နယ်စပ်တွင်ဆန္ဒပြ၍ မြန်မာနိုင်ငံမှ ကချင်လူမျိုးများကို အကာအကွယ်ပေးနိုင်ရေးအတွက် တရုတ်က ကြားဝင်ဆောင်ရွက်ရန် တောင်းဆိုခဲ့ပါသည်။ ထိုသို့ဆန္ဒပြရုံမျှဖြင့် ဖိအားများများဖြစ်မလာနိုင်ဟု ထင်ရပါသည်။ သို့သော် တရုတ်အစိုးရက ကြားဝင်ရန် ကျယ်ကျယ်ပြန့်ပြန့်တောင်းဆိုမှုများရှိနေပြီး မင်ဒရင်းဘာသာဖြင့် ဂျိန်းဖောဟုခေါ်သော တိုင်းရင်းသားအုပ်စု ၅၅ ခုတွင် ပါဝင်နေရာ နိုင်ငံရပ်ခြားရှိ ဟန် တရုတ်အသိုင်းအဝိုင်းကို ခြိမ်းခြောက်မှုရှိပြီဟု တရုတ်ကယူဆလာလျှင်မူ ဖိအားအဖြစ်ဖန်တီးပေးနိုင်မည်ဖြစ်သည်။

ပို၍စိတ်ဝင်စားဖွယ်ကောင်းသည့်အချက်မှာ နိုင်ငံပိုင်သတင်းစာများတွင် တရုတ်အပေါ် အဆိုပါကချင်ပဋိပက္ခ၏ သက်ရောက်မှုများနှင့် ပတ်သက်၍ သတင်းများရေးသားဖော်ပြထားမှုများပင်ဖြစ်ပါသည်။ တရုတ်နယ်စပ် တရုတ်နိုင်ငံဖက်သို့ မြန်မာစစ်တပ်မှ လက်နက်ကြီးများကျရောက်သောအခါ ကြီးမားသော စောဒကတက်မှုများမရှိသော်လည်း နိုင်ငံပိုင်မီဒီယာများက ကုန်သွယ်မှုတွင် သက်ရောက်မှုရှိပုံကို ကျယ်ကျယ်ပြန့်ပြန့် သတင်းများ ရေးသားခဲ့ပါသည်။ နယ်စပ်မြို့များရှိ ဆိုင်ရှင်များနှင့် အင်တာဗျုးများပြုလုပ်ထားပြီး မြန်မာဖောက်သည်များသည် တိုက်ပွဲများစကတည်းက မလာတော့ကြောင်းဖော်ပြထားသည်။

Foreign Policy ကလည်း ဆောင်းပါးရေးသားထားရာတွင် တရုတ်ပညာရှင်များက ဒီမိုကရေစီသို့သွားနေသော မြန်မာအစိုးရ နှင့်ဆက်ဆံရေးများလျှော့ချ၍ နယ်စပ်မှ တိုင်းရင်းသားအုပ်စုများအပေါ် စိတ်ရောကိုယ်ပါ ကူညီထောက်ပံ့မှုများပေးရန် တောင်းဆိုထားမှုများကို ဖော်ပြထားပါသည်။ ယခုလောလောဆယ်တွင်မူ ထိုသို့လုပ်ဆောင်ပါက အကျိုးရှိမရှိအကဲဖြတ်ရန် ခက်ခဲနေပါသေးသည်။ သို့သော် ပြီခဲ့သည့်နှစ်များတွင် တရုတ်သည် တရားဝင်အစိုးရများကိုသာ ထောက်ခံကူညီသည့်မှတ်တမ်းများ စဉ်ဆက်မပြတ်ရှိခဲ့ရာ အကျိုးရှိသည်ဟုဆိုရမည်ဖြစ်ပြီး ခွဲထွက်ရေး လှုပ်ရှားမှုများကို ဆန့်ကျင်ခဲ့ပါသည်။

တရုတ်ခေါင်းဆောင်များအတွက်အရေးကြီးသောကိစ္စဖြစ်နိုင်သည်မှာ ရေလှောင်တမံများကိစ္စဖြစ်ပါသည်။ နိုင်ငံခြားမှဝေဖန်သုံးသပ်သူများကယုံကြည်နေသည်မှာကချင်ပြည်နယ်တွင် မြန်မာကစစ်ဆင်ရေးပြုလုပ်နေသည်မှာအဆိုပြုထားသော ရေလှောင်တမံနေရာများကို ထိန်းချုပ်မှု ရရေးဖြစ်သည်ဟူသည့်အချက်ဖြစ်သည်။ ထိုရေလှောင်တမံများကို မြန်မာပြည်သူများက မလိုလားသော်လည်း တရုတ်နိုင်ငံပိုင်ကုမ္ပဏီများအတွက်မူ အရေးကြီးနေပါသည်။

အဆိုပါရေလှောင်တမံများ ပြီးစီးသွားခဲ့ပါကထွက်ရှိသောလျှပ်စစ်ဓာတ်အားအများစုကို ယူနန်သို့ပေးပို့မည်ဖြစ်ပါသည်။ လက်ရှိအားဖြင့် ယူနန်အစိုးရမှာ ကျောက်မီးသွေးသုံးဓာတ်အားပေးစက်ရုံများဖယ်ရှားရန် ဖိအားအတော်အတန် အပေးခံနေရရာ အဆိုပါရေလှောင်တမံများမှာ သန့်ရှင်းသော စွမ်းအင်အရင်းအမြစ်ဖြစ်လာနိုင်ပါသည်။

ရပ်ဆိုင်းထားသော မြစ်ဆုံဆည်ပြန်လည်စတင်ရန်လည်း တရုတ်ကစိတ်အားထက်သန်နေပါသည်။ ထို့ကြောင့် တရုတ်အနေဖြင့် ယခုတိုက်ပွဲများဖြစ်ပွားနေမှုကို စိတ်ထဲ၍ လက်သင့်မခံသော်လည်း ကျိတ်၍ဝမ်းသာနေမည်ဖြစ်ပါသည်။ နိုင်ငံတကာတွင် တရုတ်၏ပုံရိပ်ကို ထိခိုက်စေကာမူ ဖြစ်သင့်သည်ဟု တွက်ဆနေမည်ဖြစ်ပါသည်။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။