Thursday, January 31, 2013

ကချင်စစ်ပွဲကြောင့် နိုင်ငံရေး ဆွေးနွေးမှု နှောင့်နှေး

(Mizzima)


အပစ်ရပ် တိုင်းရင်းသား လက်နက်ကိုင် အဖွဲ့အစည်းများနှင့် ပြည်ထောင်စု အစိုးရတို့အကြား နိုင်ငံရေး ဆွေးနွေးမှု မစတင်နိုင်ဘဲ နှောင့်နှေးနေရသည်မှာ ကချင်ပြည်နယ် စစ်ပွဲကြောင့် ဖြစ်သည်ဟု မွန်ပြည်သစ်ပါတီ (NMSP) ကပြောသည်။

“ကချင်ပြည်နယ်တွင် ပြင်းထန်နေသော စစ်ပွဲအခြေအနေကြောင့် ပြည်ထောင်စု အစိုးရနှင့် မိမိတို့ မွန်ပြည်သစ်ပါတီအကြား သဘောတူ ဆုံးဖြတ်ထားသည့် ၂၀၁၂ ခု မကုန်မီတွင် စုစည်းနိုင်သမျှသော အပစ်ရပ် အဖွဲ့အစည်းများနှင့်ပြည်ထောင်စု အစိုးရတို့အကြား နိုင်ငံရေးအရ စတင် ဆွေးနွေးရေးသည်လည်း နှောင့်နှေးနောက်ဆုတ်ခဲ့ရသည်” ဟု ဇန်နဝါ ရီလ ၃၀ ရက်နေ့တွင် ထုတ်ပြန်သည့် NMSP ဗဟို အလုပ်အမှုဆောင် ကော်မတီ သဘောထား ကြေညာချက်တွင် ပါရှိသည်။

ပြည်ထောင်စုအဆင့်နှင့် ၂၀၁၂ ခုနှစ်၊ ဖေဖော်ဝါရီလ ၂၅ ရက်နေ့ ငြိမ်းချမ်းရေး သဘောတူချက်တွင် ပါဝင်သည့် “မိမိတို့နှင့် အပစ်အခတ် ရပ်ချိန်မှစပြီး ၂၀၁၂ ခုနှစ်၊ ဒီဇင်ဘာလအထိ အဖွဲ့အစည်းအားလုံးနှင့် အပစ်အခတ် ရပ်စဲနိုင်ခြင်း မရှိသေးပါက စုစည်းနိုင်သည့် အပစ်ရပ် အဖွဲ့အစည်းများမှ ကိုယ်စားလှယ်များနှင့် အစိုးရ ကိုယ်စားလှယ်တို့
နိုင်ငံရေး ဆွေးနွေးပွဲ စတင် ဖော်ဆောင်သွားရန်” ဟူသည့်အချက်ကို ရည်ညွှန်းပြောဆိုခြင်း ဖြစ်သည်။

NMSP အထွေထွေ အတွင်းရေးမှူး နိုင်ဟံသာ က “(ညီညွတ်သော တိုင်း ရင်းသားလူမျိုးများ ဖက်ဒရယ် ကောင်စီ) UNFC နဲ့ အစိုးရကြားမှာ နိုင်ငံ ရေးအရ ဆွေးနွေးဖို့ ပြောနေတဲ့ ကာလမျိုးမှာ တဖက်က ထိုးစစ်ကို အကြီး အကျယ် လုပ်နေပြန်တော့ တဖက်က လက်နဲ့ ရေးပြီးတော့ တဖက်က ခြေနဲ့ဖျက်တယ် ဆိုတဲ့သဘောမျိုး ဖြစ်နေတယ်လို့ ကျနော်တို့ မြင်တယ်။ ဒါ့ကြောင့် ဒီလို ကြန့်ကြာနေရတာပါ” ဟု ပြောသည်။

NMSP အနေနှင့် နိုင်ငံရေး ပြဿနာကို အစိုးရနှင့် ဆွေးနွေးဖြေရှင်းရာ တွင် မိမိတဖွဲ့တည်း သီးခြားဆွေးနွေးမည် မဟုတ်ဘဲ၊ UNFC ကို မဏ္ဍိုင် ထားကာ စုစည်းနိုင်သမျှသော အဖွဲ့အစည်းများနှင့် စုပေါင်းဆွေးနွေးသွား မည်ဟုလည်း ထုတ်ပြန်ချက်တွင် ပြောဆိုထားသည်။

၎င်းပြင် အစိုးရနှင့် ကချင် လွတ်မြောက်ရေးအဖွဲ့/တပ်မတော် KIO/KIA အကြား၊ အစိုးရနှင့် UNFC အကြား နိုင်ငံရေးဆွေးနွေးဖြေရှင်းရန် နား လည်မှု ရရှိထားပြီး ဖြစ်သည့်အတွက် အစိုးရတပ်မှ အင်အားသုံး ဖြေရှင်း ခြင်း မပြုဘဲ သဘောထားကြီးစွာဖြင့် KIO/KIA အား ဝိုင်းပတ်ပိတ်ဆို့ထား ခြင်းကို ဖွင့်ပေးကာ တိုက်ပွဲ ရပ်စဲအောင် လုပ်ဆောင်ရန်လည်း အကြံပြု ထားသည်။

အမျိုးသား တန်းတူရေး၊ ကိုယ်ပိုင်ပြဌာန်းခွင့်နှင့် စစ်မှန်သော ပြည်ထောင် စု တည်ဆောက်ရေး အခြေခံမူကို အာဏာရ အစိုးရ အဆက်ဆက်က မျက်ကွယ်ပြုခဲ့ခြင်းကြောင့် မြန်မာနိုင်ငံတွင် လူမျိုးရေး ပြဿနာ ဖြစ် ပေါ်ခဲ့ရသည်ဟုလည်း NMSP က ဆိုသည်။

နှစ်ဖက်သော ငြိမ်းချမ်းရေး အကျိုးဆောင်များ၏ ဆက်သွယ်ချက်အရ ဖေဖော်ဝါရီလ ၇ ရက်နေ့ နောက်ပိုင်းတွင် ပြည်ထောင်စု ငြိမ်းချမ်းရေး လုပ်ငန်းကော်မတီနှင့် UNFC တို့ တွေ့ဆုံနိုင်ဖွယ် ရှိသည်ဟု အစိုးရ ငြိမ်းချမ်းရေး အကျိုးဆောင် ဦးလှမောင်ရွှေ က ပြောသည်။

“နိုင်ငံရေး ဆွေးနွေးမှုတွေ ဆောင်ရွက်ဖို့ ချိန်းဆိုထားတာပါ။ သူတို့ ဘက်ကတော့ ရက်အတိအကျ ဘာမှ အကြောင်း မပြန်သေးဘူး” ဟု သူက မဇ္ဈိမကို ပြောသည်။

UNFC အထွေထွေ အတွင်းရေးမှူး နိုင်ဟံသာ ကမူ ယခုတွေ့ဆုံမှုတွင် နိုင်ငံရေး ဆွေးနွေးလိမ့်မည် မဟုတ်ဘဲ KIO/KIA အပေါ် ထိုးစစ်ဆင် တိုက်ခိုက်မှု ရပ်တန့်ပေးရေးကိုသာ အဓိကထား ဆွေးနွေးသွားမည်ဟု ဆိုသည်။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။