Saturday, January 5, 2013

ကချင်=ဗမာ သမိုင်း (အပိုင်း-၃)

(ကိုဝိုင် FB မှ)


နိုင်ငံရေး အကင်းပါးသော ဦးနုက ကချင်များကို ပြည်နယ် သတ်မှတ်ပေးသည့်အတွက် ကချင်ခေါင်းဆောင်များ ထံမှ ဂတိ တစ်ခု တောင်းပါသည်။ ထိုဂတိမှာ “ကချင်တိုင်းရင်းသားများသည် လွတ်လပ်ရေးရပြီးနောက် ဘယ်တော့ အခါမှ ပြည်ထောင်စုမှ မခွဲထွက်ရန်” ဟူသော ဂတိစကားဖြစ်သည်။ ထို့ကြောင့် ၁၉၄၇-ခုနှစ်၊ဖွဲ့စည်းအုပ်ချုပ်ပုံတွင် ကချင်ပြည်နယ် ကို ပြည်ထောင်စုမှ ခွဲထွက်ပိုင်ခွင့်ကို ထည့်သွင်းမထားခြင်း ဖြစ်သည်။

ပြည်ထောင်စု မြန်မာနိုင်ငံတော်သည် ၁၉၄၈-ခု၊ ဇန္နဝါရီလ(၄)ရက်နေ့ နံနက်(၄)နာရီတိတိ တွင် ဗြိတိသျှအစိုးရ အုပ်ချုပ်မှု လက်အောက်မှ လွတ်လပ်ရေး ရရှိခဲ့ပြီးနောက် (၆)ရက် အကြာတွင် ဇန္နဝါရီလ(၁၀)ရက်နေ့၌ ကချင်ပြည်နယ်ကို တရားဝင် မွေးဖွားခဲ့ပြီး “ ကချင်ပြည်နယ်နေ့” ဟု သမိုင်းဝင် သတ်မှတ် ခေါ်တွင်ခဲ့ပါသည်။


ထိုနေ့တွင် မြစ်ကြီးနားမြို့ စီတာပူ၊ မနောကွင်း၌ ပထမဆုံးအကြိမ် ကချင်ပြည်နယ်နေ့ အထိမ်းအမှတ်မနောပွဲကို စည်ကား သိုက်မြိုက်စွာ ကျင်းပခဲ့ကြသည်။ထို မနောပွဲသို့ မြန်မာနိုင်ငံ၏ ပထမဆုံးသော သမ္မတကြီး (ဦး) စဝ်ရွှေသိုက် ကိုယ်တိုင် တက်ရောက်ခဲ့ပြီး နံနက်(၈)နာရီတွင် မနော မဏ္ဍပ်ကြီးကို ဖဲကြိုးဖြတ် ဖွင့်လှစ်ပေးခဲ့သည်။

( မြန်မာနိုင်ငံ၏ ပြည်ထောင်စု ဖွဲ့၍ အစိုးရသစ်ပေါ်ထွန်းချိန်တွင် ပထမဆုံးသမ္မတမှာ ရှမ်း တိုင်းရင်းသား ခေါင်းဆောင် ဖြစ်နေသည်ကို ရှု ကြည့်လျှင် ရှေးအခါက ချစ်ကြည်ရေးကို တွက်ဆနိုင်ပါသည်။)

( ယခုလာမည့် ၂၀၁၃ ခု၊ ဇန္နဝါရီလ(၁၀)ရက်နေ့သည် (၆၅)နှစ်မြောက် “ ကချင်ပြည်နယ်” နေ့ ဖြစ်သည့် အတွက် ဤဆောင်းပါးရေးချိန်နှင့် တိုက်ဆိုင်နေ၍ ဝမ်းမြောက်ပါကြောင်း ကချင်တိုင်းရင်းသားတို့အား ပြောလိုပါသည်။ မိမိတို့အား စစ်ဘေးသင့် ပြည်သူများသို့ စာနာကူညီနိုင်ရန် လက်တွဲဆောင်ရွက်ပေးခဲ့သော ကချင်တိုင်းရင်းသားအဖွဲ့အစည်း အားလုံး ကို လည်း အမှတ်တရ ရှိနေပါမည်။…စကားချပ်…။)

တဆက်တည်းမှာပဲ သမ္မတကြီးသည် ပထမဆုံးသော ကချင်ပြည်နယ်ကောင်စီကိုဖွဲ့စည်းပေးပြီး ကချင်ခေါင်းဆောင် ဆမား ဒူဝါ ဆင်ဝါးနောင် အား ပြည်နယ်၏ ပထမဆုံးကောင်စီဥက္ကဌ အဖြစ် ရွေးချယ်တင်မြောက်လျက် ကျမ်းသစ္စာ ကျိန်ဆို စေခဲ့ပါသည်။ တချိန်တည်းမှာပင် နိုင်ငံတော် သမ္မတသည် ပြည်ထောင်စု မြန်မာ နိုင်ငံတော်၏ ဖွဲ့စည်းအုပ်ချုပ်ပုံ အခြေခံ ဥပဒေစာအုပ်ကို ကောင်စီဥက္ကဌသစ် လက်သို့ပေးအပ်ခဲ့သည်။

ဆက်လက်၍ ကချင်ပြည်နယ်အစိုးရသစ်ကိုလည်း တစ်ပြိုင် တည်း ဖွဲ့စည်းလျက် ဇန္နဝါရီလ(၁၀)ရက်နေ့ကို “ကချင်ပြည်နယ်နေ့” ဟူ၍ ပြည်ထောင်စု အဖွဲ့ဝင်ပြည်နယ်တစ်ရပ်အဖြစ် လူသိရှင်ကြား အခိုင်အမာ အတည်ပြုပေးခဲ့သည်။ ထိုနေ့မှစ၍ နှစ်စဉ်ကျင်းပခဲ့ပြီး မနောပွဲတော်ဟု လူသိများလျက် ကချင်ပြည်နယ်နေ့ ကို ကျင်းပနေသည်မှာ ယနေ့တိုင်ထိအောင် ဖြစ်ပါသည်။

ဖဆပလ ပါလီမန်ဒီမိုကရေစီ အစိုးရခေတ် တွင် ကချင်နိုင်ငံရေးပါတီ(၃)ခုပါသည်။

(၁) ဆမားဒူဝါဆင်ဝါးနောင် ဦးဆောင်သော ကုန်ဖန် (Kung Hpan) ပါတီ ၊

(၂) ဒူဝါဇော်လောန် ဦးဆောင်သော ကေအဲန်စီ (KNC) ပါတီ ၊

၃။ ဒူဝါဇော်ရစ် ဦးဆောင်သော လူငယ်အဖွဲ့အစည်းပါတီ (Pawng Yawng Ram Rawt Hpung ) ပါတီ တို့ဖြစ်သည်။

၎င်းတို့သည် ကချင်တိုင်းရင်းသားများကိုသာမက ရှမ်းတိုင်းရင်းသားများနှင့် ဗမာလူမျိုးများကိုပါ စည်းရုံးပြီး ပါတီစုံစနစ်ကို ပီပြင်စွာ ကျင့်သုံးခဲ့သည်ကို တွေ့ရပေမည်။

အထွေထွေ ရွေးကောက်ပွဲပြီးတိုင်း ပြည်နယ်အစိုးရသစ် ဖွဲ့သည့်အခါ ကချင် မဟုတ်သော အခြားလူမျိုးများထဲက အမတ်များကို အနည်းဆုံးဝန်ကြီးဌာန(၄) နေရာ၌ ခန့်အပ်ခဲ့သည်မှာ ချစ်ကြည်ရေး ခိုင်မာစွာ လက်တွဲခဲ့မှုကို ထင်ရှားစေခဲ့သည်။

၁၉၄၈-ခုမှ ၁၉၆၂-ခု နှစ် ကာလအတွင်းကချင်ပြည်နယ် ကောင်စီ ဥက္ကဌ အသီးသီးမှာ
(၁) ဆမားဒူဝါဆင်ဝါးနောင်
(၂) ဒူဝါဇော်ရစ်
(၃) ဒူဝါ ဇော်လောန်
(၄) ဒူဝါ ဆန်ထဆင် တို့ ဖြစ်ကြသည်။

နောက်ဆုံး အာဏာမသိမ်းခင်ထိ ဥက္ကဌမှာ ဒူဝါဇော်ရစ် ဖြစ်ပြီး ခြောက်လခန့်သာ တာဝန်ယူခဲ့ရသော်လည်း တိုတောင်း လှသည့် အုပ်ချုပ်မှုကာလတွင် ကချင်ပြည်နယ်ကို ရှိရင်းစွဲထက် များစွာ ဖွံ့ဖြိုးတိုးတက်အောင် ဆောင်ရွက်ပေးခဲ့သူဟု ကျော်ကြားသည်။

ဆမားဒူဝါဆင်ဝါးနောင်သည် နိုင်ငံတော်သမ္မတရာထူးကိစ္စနှင့် ရန်ကုန်မြို့သို့အသွား လမ်းခုလပ်မှာရောက်ဆဲ (၂-၃-၁၉၆၂) ရက်တွင် ဗိုလ်ချုပ်ကြီးနေဝင်း ဦးဆောင်သော စစ်တပ်မှ အာဏာသိမ်းလိုက်သည်။ ရန်ကုန်ရောက်သော် သမ္မတရာထူးနှင့် ပတ်သက်၍ သတင်းထောက်များက “ စစ်တပ် အာဏာသိမ်းသည့် အပေါ် ဒူဝါကြီး ဘယ်လိုမြင်သလဲ” ဝိုင်းမေးကြရာတွင် ဆမားဒူဝါဆင်ဝါးနောင်က “ ငါ့လိမ္မော်ခြံလောက်တောင်မှ စိတ်မဝင်စားဘူး” ဟု ပြန်ဖြေသည်။ မြစ်ကြီးနား ပြန်ရောက် တော့လည်း ဆွေမျိုးများက စိတ်မကောင်းစွာ ကြိုဆိုကြသည်ကိုတွေ့တော့ ၎င်းက ဘာမှခံစားမှု မပြပဲ “ အခုတော့ ငါလည်း မင်းတို့နှင့်ဘာမှ မခြားတော့ဘူး၊ မင်းတို့နှင့် အတူတူ တောင်ယာခုတ်စားမှာပေါ့” ဟုဆိုလေ၏ ။

ကချင်လူမျိုးများထဲတွင် ပထမဆုံး တက္ကသိုလ်ဘွဲ့ ရရှိသူမှာ ဗိုလ်မှူးကြီး လဖိုင်ခွန်နောင် ( Lahpai Hkun Nawng ) ဖြစ်သည်။

ကချင်ပြည်နယ်၏ ပထမဆုံး အရေးပိုင် (D.C) သည် ဒူဝါ လဖိုင်ဇော်ဂျွန်း (Du Wa Lahpai Zau Jun ) ဖြစ်သည်။

ကချင်တိုင်းရင်းသားတို့သည် မိမိနိုင်ငံတော်ကိုအထူးချစ်မြတ်နိုးပြီးတန်ဖိူးထားတတ်သောလူမျိုးများဖြစ်ကြသည့် အားလျော် စွာ ကျူးကျော်ဝင်ရောက်သော အင်္ဂလိပ်၊ ဂျပန် တို့အား အသက်ပေါင်းများစွာ စွန့်လွတ်ခံ၍ ကာကွယ်တိုက်ခိုက်ပေးခဲ့သော လူမျိုးများဖြစ်ပါသည်။

လွတ်လပ်ရေးရပြီးခါစ ပြည်ထောင်စုနိုင်ငံတော်အား ကာကွယ်ရာတွင်လည်း ကချင်တိုင်းရင်းသား တို့သည် ထိပ်ဆုံးမှပါဝင်ခဲ့သည်ကို သမိုင်းတွင်တွေ့ရှိနိုင်ပါသည်။ ထိုအချိန်က ရောင်စုံသူပုန်များ ပေါ်ပေါက်စဉ်ကာလဖြစ်ပြီး ကချင် တပ်ရင်းများ၊ ကချင်တိုင်းရင်းသားများ မှ ပြည်ထောင်စုအတွက် ရွပ်ရွပ်ချွံချွံ တိုက်ခိုက်၍ ကာကွယ်ခဲ့ကြသည်။ (အင်းစိန်တိုက်ပွဲသည် အထင်ရှားဆုံး ဖြစ်သည်။)

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။