Thursday, January 10, 2013

ဖွန်းပျန်ဘွမ် စခန်း ဌာနချုပ်ကို ထပ်မံ စစ်ဆင်ရန် အစိုးရ ပြင်ဆင်


(ရွှေဟင်္သာသတင်းဌာန)

အစိုးရ တပ်ဖွဲ့ဝင်များသည် ထိခိုက် ကျဆုံးမှုများ သဖြင့် KIA တပ်မဟာ (၅) လက်အောက်ခံ တပ်ရင်း(၂၄) စခန်း ဌာနချုပ် ဖြစ်သော ဖွန်းပျန်ဘွမ် စခန်းကို ယနေ့ စစ်ဆင်နိုင်ခြင်း မရှိဘဲ ရပ်တန့် နေသည်ဟု KIA တပ်ရင်း (၂၄) မှ ရှေ့တန်း အရာ ရှိတဦးက ဆိုပါသည်။
  
“ ဒီလိုပါ။ မနေ့တုန်းက (၆)ကြိမ်လောက် တပ်ရင်း (၂၄) စခန်းကို တက်တိုက်ပါတယ်။ (၆) ကြိမ်စလုံး လန်ကျသွားတာ ပေါ့။ ဒီတိုက်ပွဲမှာ အကျအဆုံး များလိမ့်မယ်။ မျက်မြင် ရွာသားတွေပြောတာက ထမ်းစင်နဲ့ က (၃၀) လောက်၊ ကျိုင်း တောက်နဲ့က (၂၀) လောက်၊ တခြား ထိခိုက် မှုတွေလဲ ရှိသေးတယ်။ လမ်းလျှောက်နိုင်တဲ့လူတွေပေါ့။ သူတို့ ဗန်းမော် ဖက်ကို ဆင်းသွားကြတယ်ဗျ။ ဒါကြောင့် ထင်ပါတယ် ကနေ့ သူတို့ တိုက်ပွဲ ရပ်တယ်ဆိုတာက အဲဒါတွေကို စီစဉ် နေလို့ဖြစ်လိမ့်မယ်။ ပြီးတော့ အသေအပျောက်တွေကိုလဲ ရှင်းနေတဲ့ပုံလဲ ရပါတယ်။ အမြောက် (၈) လုံးလောက် ဟိုပစ် ဒီပစ် လုပ်တာဘဲ ရှိပါတယ်။” ဟုဆိုပါသည်။ 


ယခု KIA တပ်ရင်း (၂၄) ဌာနချုပ်ကို တပ်ရင်း (၂) ရင်းအပြင် အထူး တပ်များနှင့် အင်အား (၅၀၀)ခန့် စစ်ဆင်နေသည် ဟု KIA ရှေ့တန်း တပ်မှူးက ဆိုပါသည်။ သို့သော် ယမာန်နေ့ စစ်ဆင်ရေး၌ ထိခိုက် ကျဆုံးမှု အနဲဆုံး (၇၀)ခန့် ရှိလိမ့် မည်ဟု ခန့်မှန်းထားပါသည်။ ဤသို့ ကြောင့် ယနေ့ တိုက်ပွဲ ရပ်ထားရခြင်း ဖြစ်ဖွယ်ရှိပါသည်။ 

သို့သော် ဤစစ်ဆင်ရေးအတွက် အရန်စစ်ကူများအဖြစ် ခလရ (၁၄၂)၊ ခမရ (၂၇၆) တပ်မ (၂၂)မှ တပ်ရင်းအချို့နှင့် ပြည်သူ့စစ်တပ်ဖွဲ့များ ရှိနေသည်ဟု ဆိုပါသည်။ 

အစိုးရသည် လိုင်ဇာဌာနချုပ်ကို လာမည့် ဖေဖေါ်ဝါရီလ (၁၂)ရက်နေ့ ပြည်ထောင်စုနေ့ မတိုင်ခင် သိမ်းပိုက်ရန် ရှိသည် ဟု KIA ဖက်က တွက်ဆထားပါသည်။ ဗန်းမော်၊ မြစ်ကြီးနား ဆေးရုံတွင် တပ်သား လူနာများ ပြည့်ကြပ် ညှပ်လျှံနေသည့် အခြေအနေမျိုးဖြစ်ပြီး မကွေးတိုင်းရှိ တပ်ရင်း ဌာနချုပ်များ၌လည်း ရက်လည် ဆွမ်းများနှင့် အစိုးရ အပေါ် မကြေနပ်မှုများ ဖြစ်ပေါ်နေသည်ဟုဆိုပါသည်။ 

သို့သော်လည်း အစိုးရသည် KIA အပေါ် စိတ်ဓါတ်စစ်ဆင်ရေးများ တိုးပြီးတိုက်ခိုက်လာပါသည်။ မြစ်ကြီးနား ရထားကို ဗုံးခွဲခြင်းကိစ္စကို ဖန်တီးပြီး KIA အားစွပ်စွဲနေခြင်း၊ သမ္မတကလည်း ကချင်ပြည်နယ် ငြိမ်းချမ်းရေးကိစ္စများမှ အတွေ့အ ကြုံများအား ရယူ၍ ပိုမိုကောင်းမွန် သော စီမံခန့်ခွဲမျိုး လုပ်ဆောင်ရန် ရှိ ကြောင်း နှစ်သစ်လွှတ်တော် သ၀ဏ်လွှာစာကို ၀ါဒဖြန့်ခြင်းနှင့် တပ်မ (၃၃) တပ်မ(၇၇) စစ်ကူများ ပေးပို့နေခြင်းနှင့် ဒေါ့ဖုန်းယန်ရှိ ဟန်ကိုင်းတောင် လက်နက်ကြီးစ ခန်း မှာ KIA တိုက်ခိုက်ခြင်းကြောင့် ပြောင်းရွှေ့ရခြင်း မဟုတ်ဘဲ အစီစဉ်အရ ပြောင်းရွှေ့နေသယောင်များကို ၄င်းတို့၏ ခရို နီမီဒီယာများနှင့် လူထု ဆက်ဆံရေး (ဆိုရှယ်) မီဒီယာများကို အသုံးချပြီး ၀ါဒဖြန့်နေသည်ဟု KIA ကဆိုပါသည်။

ထို့အပြင် KIA စခန်းများစွာ ကိုလည်း ၄င်းတို့သိမ်းပိုက်ထားပြီးဖြစ် ကြောင်း မြေပုံများနှင့်တကွ ၀ါဒဖြန့်နေကြောင်း၊ KIA များကိုတန်ပြန်ရန်၊ ကျေးရွာပြည်သူ့များကိုလည်း ဖွဲ့စည်းနေကြောင်း ၀ါဒဖြန့်ထားသည်ဟု ဆိုပါသည်။ အမှန်မှာမူ ပြည် သူ့စစ်များကို အတင်းစုဆောင်းပြီး၊ အရန် တပ်ဖွဲ့အဖြစ်ထားရှိကာ ကချင်နှင့် လူမျိုးမတူသူများကို အသုံးချပြီး စိတ်နာ အောင် စီစဉ်နေခြင်းရှိသလို တိုက်ပွဲပြင်းထန်သော နေရာများသို့ ပြည်သူ့စစ်အမည်ခံ ကချင်ရွာသားများကို အသုံးပြု ခြင်းဖြင့်သေကြေ ပျက်စီးအောင် ဖန်တီးဆောင်ရွက်နေသည်ဟုဆိုပါသည်။ 

ဤကဲ့သို့ ၀ါဒဖြန့်နေခြင်းနှင့်အတူ ဖွန်းပျန်ဘွမ်စခန်းစစ်ဆင်ရေးကို နက်ဖြန်၌ ပြန်စရန်စီစဉ်ထားကြောင်း၊ လေကြောင်း အကူအညီကိုလည်း ထပ်မံအသုံးပြုပြီး ပြင်းထန်စွာတိုက်ခိုက်မည်ဟု KIA ဖက်မှတွက်ချက် ထားပါသည်။ အစိုးရသည် လိုင်ဇာ စစ်ဆင်ရေး အတွက် ဗန်းမော်-လဂျာယန်လမ်းကြောင်းကို အဓိကထားပြီးချီတက်နေပါသည်။ KIA ဖက်မှလည်း စစ်ဆင်လာသမျှသော အစိုးရတပ်များကို အပြင်းအထန် ခုခံသွားမည်ဟု ဆိုပါသည်။ 

အစိုးရ၏ စစ်ဆင်ရေး အနိုင်အရှုံးသည် မြောက်ပိုင်းတိုင်း တိုင်းမှူး၏ ရာဇသံပေးသည့် ဒီဇင်ဘာ(၂၅)ရက်နေ့မှစပြီး ရေ တွက်ရလျှင် ကြည်း တပ်အင်အား အလုံးအရင်းနှင့် လေကြောင်းပစ်ကူများ ပြင်းပြင်းထန်ထန် အသုံးပြုသော်လည်း KIA တပ်ရင်း(၂၃)ဌာချုပ်စခန်းဖြစ်သော ပွိုင့် (၇၇၁) တောင်ကုန်းတကုန်းသာ ရရှိထားပါသည်။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။