Wednesday, January 30, 2013

ကာချုပ် ဗိုလ်မင်းအောင်လှိုင် နှင့် ကြံ့ဖွံ့အမတ်မင်း (ဗိုလ်) ဦးလှဆွေတို့၏ ကြောင်းတူသံကွဲများပြောဆိုချက်များ


တူမောင်ညို၊ ၂၉ ဇန်န၀ါရီ ၂၀၁၃

သတင်းရင်းမြစ် - မိုးမခ


ယခုရက်ပိုင်းအတွင်း မြန်မာနိုင်ငံအထူးဒေသ(၂) “ဝ” ပြည် နယ် အစိုးရသည် (KIO) နှင့် အစိုးရ၏ “ငြိမ်းချမ်းရေး ဖေါ်ဆောင်ရေး လုပ်ငန်းကော်မတီ”တို့ တွေ့ဆုံဆွေးနွေး နိုင်ရေးအတွက် တာဝန်သိသော စိတ်ထားဖြင့် အဆိုပြုချက်တစ်ရပ်ကို ထုတ်ဖေါ်ပြောဆိုလာခဲ့သည်။

နှစ်ဖက် ကိုယ်စားလှယ်များ “ပန်ဆန်း” တွင် တွေ့ဆုံ ဆွေးနွေး နိုင်ရန် စီစဉ်ပေးမည်ဟု နှစ်ဖက်စလုံးသို့ ဖိတ်ကြား အဆိုပြုလိုက် ပါ သည်။


ထို့အပြင်၂၀၁၃ ခုနှစ်၊ ဇန်နဝါရီလ ၁၀ ရက်နေ့ရက်စွဲဖြင့် မြန်မာနိုင်ငံအထူးဒေသ(၂)“ဝ”ပြည်နယ်၊ ရှမ်းပြည်နယ် အထူးဒေသ (၃) (SSA/SSPP) ၊ ရှမ်းပြည်နယ် အရှေ့ပိုင်းအထူးဒေသ(၄) (မိုင်းလား) တို့၏ (၃) ဖွဲ့ ပူးတွဲ ကြေညာချက် ထုတ်ပြန်ခဲ့ပြီးလည်းဖြစ်သည်။ ပေါ်ပေါက်ဖြစ် ပွားနေသော စစ်ကို နှစ်ဖက်စလုံးမှ ချက်ချင်း ရပ်ဆိုင်းပြီး၊ နိုင်ငံရေး စကား ပြောကြရမည်။

“ရွှေလီ”မှာ ပြောသည်ထက် “ပန်ဆန်း”မှာ ပြောသည်က သဘာဝပိုကျပါသည်။ ပြည်တွင်း ပြဿနာကို ပြည်တွင်းမှာသာ ဖြေရှင်း အဖြေရှာကြရမည်မ ဟုတ်ပါလော။

ထို့အပြင် “ပန်ဆန်း” တွင် လူချင်းတွေ့၍ ဆွေးနွေးကြသည်က “ ပွင့်လင်းမြင်သာသော Electronic Online မှု” ဆိုသော လွှတ်တော် တိုက်တွန်းချက်ဆိုသည်ထက် ပို၍ အလုပ်ဖြစ်နိုင်လိမ့်မည်ဟု ယူဆရ သည်။“ ပွင့်လင်းမြင်သာသော Electronic Onlineမှု” ဖြစ်မြောက်ရန် လျှပ်စစ်မီး ပုံမှန်လာဖို့ ၊ လျှပ်စစ်မီး မပျက်ဖို့လိုသည်။ MPT ၏ နှေး ကွေးသော online ဝန်ဆောင်မှုမျိုး ဖြင့်မဖြစ်နိုင်ချေ။

ဆွေးနွေးမည့် နေရာကိစ္စမှာ နှစ်ဖက်စလုံး လက်ခံနိုင်မှသာ ဖြစ်မြောက်လိမ့်မည်။ ဆွေးနွေးပွဲ အောင်မြင်မည်/ မအောင်မြင်ဆို သည့် ကိစ္စမှာ အဓိကအားဖြင့် လက်ရှိ စစ်တပိုင်း အစိုးရအပေါ်တွင် အများကြီး တည်မှီနေပါသည်။

(ဗိုလ်) ဦးသိန်းစိန်ကြံ့ဖွံ့အစိုးရအနေဖြင့် နိုင်ငံရေးအရ တန်းတူ ရည်တူ ဆွေးနွေးဖြေရှင်းခြင်းမပြုဘဲ၊ “သေနတ်/လှည့်ဖျားမှု” တို့ ဖြင့်သာ “၂၀၀၈ အခြေခံဥပဒေဘောင်”ထဲ ဇွတ် အတင်း သွတ်သွင်းနေမည် ဆို လျှင် ရလဒ်ကောင်းရနိုင်စရာ မရှိချေ။

(၃)ဖွဲ့ ပူးတွဲကြေညာချက်တွင် သုံးသပ်ဖော်ပြထားသကဲ့သို့ “ပြည်တွင်းစစ်မီး၏ ခြေရာကို ပြန်လည်နင်းသွားမှာ သေချာလှသည်”

ကချင်ပြည်နယ်ရှိလူမျိုးစုံပြည်သူများအပါအဝင် တပြည်လုံးရှိ လူမျိုးစုံပြည်သူအပေါင်းတို့သည် ပြည်တွင်းစစ်ကို အပြီးတိုင်ရပ် ဆိုင်း ပြေငြိမ်းပြီး၊ ပြည်တွင်းငြိမ်းချမ်းရေးအစစ်အမှန်ကို တကယ်တမ်း ဖြစ်နိုင် သမျှ ဆောလျှင်၊ လျှင်မြန်စွာရရှိလိုသူများဖြစ်ပါသည်။

လတ်တလောအားဖြင့် လက်ရှိအနေအထား၌ ကချင်ပြည်တွင် ပေါ်ပေါက်ဖြစ်ပွားနေသော စစ်ရန်မီးကို ချက်ချင်းရပ်ဆိုင်းစေ လိုကြပါ သည်။ ဤသို့ရပ်ဆိုင်းနိုင်ရေးအတွက် မိမိတို့ အားထားသော၊ လေးစား ယုံကြည်သော ဒေါ်အောင်ဆန်းစုကြည်နှင့် အမျိုးသား ဒီမိုကရေစီ အဖွဲ့ချုပ်(NLD)ထံမှ အသံ၊ သဘောထားနှင့် ရှေ့ဆောင်ရှေ့ရွက်ပြုမှု တစ်ခုခုကို အားတက်သရောမျှော်ကြည့်ခဲ့ကြသည်။

သို့သော်လည်း ယနေ့အချိန်အထိ လူမျိုးစုံပြည်သူများ အား ထားသလို၊ မျှော်လင့်သလို၊ တောင့်တ လိုလားသလိုကား ဖြစ်ပေါ် လာခြင်းမရှိခဲ့ချေ။

“မဖိတ်ခေါ်၍မပါဝင်နိုင်”ဟု ပြောဆိုခြင်းမှာ “ထမင်းရေပူ လာလျှာလွှဲ” ဆိုသည့် သဘောသာ ဖြစ်ပါသည်။ ယင်းသို့ပြောဆိုသည် ထက် နိုင်ငံရေးခေါင်းဆောင်တစ်ဦး၊ နိုင်ငံရေးပါတီတစ်ရပ်၏ သဘော ထား အမြင်နှင့် ဖြေရှင်းနိုင်မည့် အဆိုပြုချက်တစ်ရပ်၊ လုပ်ငန်းစဉ် တစ်ရပ် ကို တာဝန်သိသိ၊ တာဝန်ရှိရှိ ပြောဆိုရပါမည်၊ ထုတ်ပြန်ရပါမည်။

မိမိတို့ တစ်ပါတီတည်းဖြင့် မစွမ်းသာလျှင် အခြားသောပြည် တွင်း ငြိမ်းချမ်ရေးလိုလားသည့် နိုင်ငံရေးပါတီများနှင့် ဆက်သွယ် ညှိနှိုင်း ဆောင်ရွက်သင့်သော ကိစ္စဖြစ်ပါသည်။ ပြည်တွင်းငြိမ်းချမ်းရေး ကိစ္စသည် (NLD)၏တာဝန်ကြီး ၃ ရပ်အနက် တစ်ခုအပါအဝင်လည်း ဖြစ်သည်။

မိမိတို့လူမျိုးစုံပြည်သူများဘက်မှလည်း မိမိတို့၏ ငြိမ်းချမ်းရေး စကား၊ နိုင်ငံရေးပြဿနာကို နိုင်ငံရေးအရ ဆွေးနွေးဖြေရှင်းရ မည့်စကား ကို ကျယ်ကျယ်လောင်လောင်ပြောဆိုကြရလိမ့်မည်။ ငြိမ်းချမ်းရေး အတွက် တတ်နိုင်သည့်ဘက်မှလှုပ်ရှားဆောင်ရွက်ကြရလိမ့် မည်။

ကချင်ပြည်နယ်သို့ လမ်းလျှောက်ချီတက်နေသော ငြိမ်းချမ်း ရေး လှုပ်ရှား မှုသည် မှန်ကန်သောကြိုးပမ်းအား ထုတ်မှုဖြစ်ပါ သည်။ ချီ တက်ရာ လမ်း တစ်လျှောက်ရှိ ငြိမ်းချမ်းရေးလိုလားသော လူမျိုးစုံပြည် သူများက အား ပေး၊ ကူညီ၊ ပါဝင်ကြရလိမ့်မည်။ ငြိမ်းချမ်းရေး ချီ တက်မှု ခရီးစဉ်တွင် ပါဝင်သူ များကို ဖမ်းဆီးခြိမ်းခြောက်ခြင်း၊ အတင်းအကြပ် ဝန်ခံ လက်မှတ် ရေးစေခိုင်းနေခြင်းများမှာ အကျည်းတန် အရုပ်ဆိုးလှ သော လုပ်ရပ်များ သာဖြစ်ပြီး၊ ငြိမ်းချမ်းရေးလှုပ်ရှားမှုကို ဝင်ရောက်ဟန့် တားနှောင့်ယှက် နေသည့် သဘောထားနှင့် လုပ်ရပ် များသာဖြစ်သည်။ ငြိမ်းချမ်းရေး မလိုလား သူများ၏ လုပ်ရပ်ဆိုးများ ရပ်တန်းက ရပ်သင့် သည်။

လွှတ်တော်ထဲတွင် ကြံ့ဖွံ့ကိုယ်စားလှယ်အမတ်မင်းသည် “အပြုတ်တိုက်မည့်စကား”၊ “သေနတ်စကား”ကို ရဲတင်းစွာ ပြောနေ သည် မဟုတ်ပါလော။ ဤသည်မှာ ကြံ့ဖွံ့အမတ်မင်း (ဗိုလ်) ဦးလှဆွေ၏ တစ်ဦးချင်းသဘောထားမဟုတ်၊ ကြံ့ဖွံ့ပါတီ၏ သဘောထားဖြစ် သည်။ လက်ရှိကြံ့ဖွံ့ပါတီကို (ဗိုလ်) ဦးသိန်းစိန်နှင့် (ဗိုလ်) ဦးရွှေမန်း၊ (ဗိုလ်) ဦးဌေးဦးတို့ ခေါင်းဆောင်နေသည်။

စစ်တပ်ဦးစီးချုပ် ဗိုလ်မင်းအောင်လှိုင်ကလည်း မလေးရှား ဝန်ကြီးချုပ်နှင့်တွေ့ဆုံရာတွင်

“မိမိတို့နိုင်ငံမြောက်ပိုင်းတွင်လည်း ထိုင်းနိုင်ငံတောင်ပိုင်းကဲ့သို့ ပြဿနာတစ်ရပ်ရှိနေပြီး ၄င်းပြဿနာမှာ တိုင်းရင်းသားပြဿနာဟု ယူဆ၍ရသော်လည်း လက်နက်ကိုင်လမ်း စဉ်ကြောင့် ပိုမိုခက်ခဲပါ ကြောင်း” ဟူ၍ (KIO) နှင့်ပြဿနာကို ရည်ညွန်း ပြောဆိုခဲ့သည်။

တရုတ်ပြည်သူ့လွတ်မြောက်ရေးတပ်မတော် (PLA) ဒုတိယ စစ်ဦးစီးချုပ်နှင့် တွေ့ဆုံရာတွင်လည်း

“မိမိကိုယ်ကို ခုခံကာကွယ် ပိုင်ခွင့်သည် စစ်ရေးအရ လာေ ရာက်တိုက်ခိုက်မှ ကာကွယ်ရန်မဟုတ်ဘဲ၊ လာရောက် မတိုက်ခိုက်နိုင် အောင် ကာကွယ်ရန်လည်း လိုအပ်ပါကြောင်း” နှင့် “ကချင်ပြည်နယ် အတွင်း နိုင်ငံတော်အစိုးရအပေါ် လက်နက်ကိုင်ဆန့်ကျင်သည့် အခွင့် အရေးရနေသည့်အကြောင်းရင်းကိုရှာ ၍ နှစ်ဖက်မှ စနစ်တကျ ပူးပေါင်း တားဆီးရန် လိုအပ်ပါကြောင်း” ပြောခဲ့သည်။

(PLA) ဒုတိယဦးစီးချုပ်အား ဤသို့ ပြောဆိုချက်သည် “လိုင်ဇာ” တစ်ခုထဲအတွက် မဟုတ်၊ “ပန်ဆန်း” နှင့် “မိုင်းလား” အတွက် လည်းရည်ရွယ်ပုံရသည်။ “လိုင်ဇာ”၊ “ပန်ဆန်း”၊ “မိုင်းလား” တို့သည် တရုတ်ပြည်ကို ကျောမှီထားကြရသည်။

စစ်တပ်ဦးစီးချုပ် ဗိုလ်မင်းအောင်လှိုင် မလေးရှားဝန်ကြီးချုပ်သို့ ပြောစကားနှင့် (PLA) ဒုတိယစစ်ဦးစီးချုပ်ကိုပြောသော စကား များမှာ စစ်တပ်၏ သဘောထားကို ထင်ဟပ်နေသည်။

ထို့အပြင် စစ်တပ်ဦးစီးချုပ် ဗိုလ်မင်းအောင်လှိုင် ပြောသည့် စကားနှင့် လွှတ်တော်ထဲတွင် ကြံ့ဖွံ့ကိုယ်စားလှယ်အမတ်မင်း ပြော သည့် စကား “ကြောင်းတူသံကွဲ” ဖြစ်နေသည်မှာ သာမန်တိုက်ဆိုင်မှုမဟုတ်ပါ။


ညွန်း

- ၂၀၁၃ ခုနှစ်၊ ဇန်နဝါရီလ ၁၀ ရက်နေ့ရက်စွဲဖြင့် မြန်မာနိုင်ငံအထူး ဒေသ(၂)“ဝ”ပြည်နယ်၊ ရှမ်းပြည်နယ်အထူးဒေသ (၃) (SSA/SSPP) ၊ ရှမ်းပြည်နယ် အရှေ့ပိုင်းအထူးဒေသ(၄)(မိုင်းလား) တို့၏ (၃) ဖွဲ့ ပူးတွဲ ကြေညာချက်

- ၁၁ ဇန်နဝါရီ ၂၀၁၃ - ပြည်ထောင်စုငြိမ်းချမ်းရေး ဖော်ဆောင်ရေး ဗဟိုကော်မတီနှင့် KIO/KIA သို့ ပြည်သူ့လွှတ်တော်၏ တိုက်တွန်းချက်

(၁၈ ဇန်နဝါရီ ၂၀၁၃ မြန်မာ့အလင်းသတင်းစာ)

- မြဝတီသတင်းစာ၊ ၁၉ ဇန်နဝါရီ ၂၀၁၂

- မြဝတီသတင်းစာ၊ ၂၁ ဇန်နဝါရီ ၂၀၁၂

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။