Tuesday, January 29, 2013

ငြိမ်းချမ်းရေးအတွက် လမ်းလျှောက်သူများ တောင်ငူရောက်ပြီ

(ဧရာဝတီ)


ရန်ကုန်မှ ကချင်ပြည်နယ် လိုင်ဇာမြို့အထိ ငြိမ်းချမ်းရေး လမ်းလျှောက် သည့် အဖွဲ့သည် ယနေ့ နေ့လယ် ၂ နာရီတွင် တောင်ငူမြို့ သို့ ရောက်ရှိပြီ ဖြစ်ကြောင်း သိရသည်။

အဆိုပါ အဖွဲ့ကို တောင်ငူမြို့ပေါ်ရှိ အာဏာပိုင်များက ဖမ်းဆီးမည်ဟု အသံများ ထွက်ပေါ်နေသော်လည်း လက်ရှိအချိန်အထိ တားမြစ် ဖမ်းဆီး ခြင်းများ မရှိသေးကြောင်း ယင်းအဖွဲ့တွင် ပါဝင်လမ်းလျှောက်သည့် ဆရာတော် ဦးရက္ခဝံသက ဆိုသည်။


“အာဏာပိုင်တွေက လာပြီးတားဆီးခြင်း မရှိသေးဘူးဆိုပေမယ့် မြို့အဝင် တည်းက အထူးရဲတပ်ဖွဲ့တွေက လိုက်နေတယ်။ တားဆီးတာရှိလည်း ဖြေရှင်းပြီးတော့ ဆက်သွားမှာပဲ” ဟု ဆရာတော်က ဧရာဝတီသို့ မိန့် သည်။

၎င်းအဖွဲ့အနေဖြင့် တားဆီးမှုများရှိသည့် တိုင်အောင် လိုင်ဇာမြို့သို့ ရောက် သည်အထိ လမ်းလျှောက်မည် ဖြစ်ပြီး တနေ့လျှင် မိုင်၂၀ အထိ ရောက်အောင် လျှောက်မည်ဟု သိရသည်။ လက်ရှိ အဖွဲ့အတွင်း သံဃာ တော် ၅ ပါးနှင့် လမ်းလျှောက်သူ ၃၀ ဦး ပါရှိသည်။
ငြိမ်းချမ်းရေး လမ်းလျှောက်အဖွဲ့သည် တောင်ငူမြို့ပေါ်ရှိ သီရိဥသျှောင် ဘုန်းကြီးကျောင်းတွင် တည်းခိုမည်ဖြစ်ကြောင်း သိရသည်။

ငြိမ်းချမ်းရေး လမ်းလျှောက်အဖွဲ့အတွက် သီချင်းဆိုကာ အလှူငွေ ကောက်ခံရန် တောင်ငူမြို့သို့ ယမန်နေ့က ရောက်ရှိခဲ့သည့် “ပန်းရဲ့လမ်း” လူမှုကွန်ယက် အဖွဲ့ဝင်တဦးက “ကျနော်တို့ လမ်းလျှောက်အဖွဲ့ အတွက် သီချင်းဆိုပြီး အလှူငွေ သွားရှာဖို့ ရောက်သွားတာပါ။ မြို့အုပ်ချုပ်ရေးမှူး ကတော့ သီချင်းဆိုတာ ခွင့်ပြုချက် မယူလို့ဆိုပြီး ခေါ်စာပို့တယ်၊ ခံဝန် လက်မှတ်တော့ ထိုးလိုက်ရတယ်” ဟု ပြောသည်။

ပန်းရဲ့လမ်း လူမှုကွန်ယက် အဖွဲ့အနေဖြင့် ငြိမ်းချမ်းရေးလမ်းလျှောက် သူများကို အလှူငွေများ လှူနိုင်ရန်အတွက် တောင်ငူ မြို့ပေါ်၊ မြို့သစ်နှင့် အုတ်တွင်းမြို့တို့တွင် သီချင်းများဆိုကာ ရန်ပုံငွေများရှာဖွေခဲ့ကြောင်း၊ တောင်ငူမြို့ အုပ်ချုပ်ရေးမှူးက သီချင်းဆိုရန် ကြိုတင်ခွင့်ပြုချက် ယူရမည်ဟုဆိုကာ ခေါ်စာနှစ်ကြိမ် ပို့ခဲ့ပြီး လာမည့် ၃၁ ရက် နေ့မှသာ မြို့ပေါ်တွင် သီချင်းဆိုခွင့် ပေးမည်ဟု ပြောဆိုခဲ့ကြောင်း သိရသည်။

လိုင်ဇာမြို့အထိ လမ်းလျှောက်ချီတက်မည့် ငြိမ်းချမ်းရေးအဖွဲ့ကို တောင်ငူမြို့အရောက်တွင် ဖမ်းဆီးမည်ဟု မြို့ပေါ် ရပ်ကွက်များတွင် မြို့နယ်အုပ်ချုပ်ရေးမှူးရုံးမှ အမိန့်စာထုတ် ကြေညာသည် ဆိုသည့် သတင်းနှင့် ပတ်သက်၍ အတည်ပြုချက် ရယူရန် ဧရာဝတီက တောင်ငူ ခရိုင် ရဲစခန်းမှူးရုံးသို့ ဆက်သွယ်မေးမြန်းရာ အဆိုပါရုံးမှ တာဝန်ရှိသူ တဦးက အထက် အဖွဲ့အစည်း၏ ညွှန်ကြားချက် မရှိသဖြင့် ဖြေကြားပေး ရန် မဖြစ်နိုင်ကြောင်း ပြန်လည် ပြောဆိုသည်။

တောင်ငူမြို့နယ် အုပ်ချုပ်ရေးမှူးရုံးကလည်း ဧရာဝတီက ဆက်သွယ် သည့် တယ်လီဖုန်းကို လက်ခံဖြေကြားခြင်း မရှိပေ။

ငြိမ်းချမ်းရေး လမ်းလျှောက်အဖွဲ့သည် ရန်ကုန်မြို့မှ ဇန်နဝါရီ ၂၁ ရက် နေ့တွင် စတင်ထွက်ခွာခဲ့ပြီး ၉ ရက်မြောက်နေ့တွင် တောင်ငူမြို့အထိ ရောက်နေပြီဖြစ်ပြီး ထိုမှတဆင့် မည်သည့်မြို့သို့ ခရီးဆက်ရမည်ကို စဉ်းစားဆဲဖြစ်ကြောင်း အဖွဲ့ဝင် ဆရာတော် ဦးရက္ခဝံသက ပြောသည်။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။