Saturday, September 8, 2012

ဗမာစစ်တပ် ဆိုင်းတောင်အနီး ဆိုင်းအောင်ရွာအတွင်းသို့ ပရမ်းပတာပစ်ခတ်


(Jinghpawkasa)


စက်တင်ဘာလ ၇ ရက်နေ့ ညနေ ၇ နာရီခွဲခန့်တွင် ဆိုင်းအောင်ရွာ အနီးတောထဲတွင် ပုန်းအောင်းနေသော ဗမာစစ်သားများသည် KIA ပြည်သူ့စစ်တို့ထောင်ထားသော မိုင်းနင်းမိပြီး ၁၀ ဦး ကျော်ခန့် ဒဏ်ရာရရှိ သွားပါသည်။ စိတ်ဆိုးဒေါသထွက်နေသော ဗမာစစ်သားများသည် လက်နက်ကြီးလက်နက်ငယ် များဖြင့် ဆိုင်းအောင်ရွာအတွင်းသို့ ပရမ်း ပတာပစ်ခတ်ခဲ့ပါသည်။ ပစ်ခတ်မှုကြောင့် လူ ၄ ဦးထက်မနည်း ဒဏ်ရာ ရရှိပြီး၊ နေအိမ်တစ်လုံး ပျက်စီးသွားပါသည်။ လမ်းသွားလမ်းလာများကို လည်း ဒူးထောက်၊ လက်မြှောက်ခိုင်းကာ ဆဲရေးတိုင်းထွာကာ ရိုက် နှက်ကြောင်း၊ အချို့ မှ သေနတ်သံများကြောင့်  ကြောက်လန့်ကာ ထွက်ပြေးလာသဖြင့် စစ်သားများ၏ အော်သံကို မကြားဘဲ ဆက်သွား မိသဖြင့် တရုတ်လူမျိုးတစ်ဦး သေနတ်ဖြင့် ပစ်ခံခဲ့ရပါသည်။ ၀မ်းဗိုက်တွင် ထိခိုက်သွားပြီး ဖားကန့် ဆေးရုံကြီးတွင် ဆေးကုသခံယူနေကြောင်း သတင်းရရှိပါသည်။ 

ထိုစစ်သားများသည် ကျောက်စိမ်းကုမ္မဏီဝင်း အနောက်ဖက်ရှိ တောင် ပေါ်မှ ဆိုင်းအောင်ရွာအတွင်းသို့   သေနတ်များဖောက်ကာဝင်ရောက် လာခြင်း ဖြစ်ကြောင်း ဒေသခံတစ်ဦးကဆိုပါသည်။

ပဒိုင်းတောင် (ဖရီဘွမ်) တွင် ဗမာစစ်သား ၆ ဦးကျ


(Jinghpawkasa)

ဆိုင်းတောင်နမ့်မှော်အနီး ပဒိုင်း တောင်တွင် စက်တင်ဘာလ ၇ ရက်နေ့ ညနေ ၉ နာရီခန့်တွင် တောတွင်း တွင်ပုန်းအောင်းနေ တာမခန်မှ ဗမာ စစ်တပ်သည် စစ်ကြောင်းချီလာရာ အသင့် စောင့်ဆိုင်းနေသော KIA တပ်ရင်း ၆ မှ မျိုးချစ်ပြည်သူ့စစ်များနှင့် တိုက်ပွဲဖြစ်ကာ ၆ ဦး ခန့် ကျဆုံး သွားကြောင်း အရာရှိတစ်ဦးက အတည်ပြုပြောကြားလာပါသည်။ ထိုစစ် တပ်မှာ တာမခန်သို့   ပြန်လည် ဆုတ်ခွာသွားကြောင်း၊ ကျဆုံးသွားသော စစ်သားများ၏ လက်နက်များကို ကိုင်ဆောင်ကာ စစ်သားတစ်ဦးလျှင် လက်နက် ၂ လက်စီဖြင့် တာမခန်ဖက်သို့ ဆုတ်ခွာသွားသည် ဟု အရပ်သား မျက်မြင်တစ်ဦးက အတည်ပြုပြောကြားလာပါသည်။

အစိုးရတပ်ဖွဲ့မှ ဖားကန့် ဒေသခံတစ်ဦးအား ဆာလာအိတ်တွင် ထည့်၍ နှိပ်စက်သတ်ဖြတ်

(ကချင်သတင်းဌာန)


ကချင်ပြည်နယ် ဖားကန့်မြို့နယ်ရှိ မော်မှော်ဘွမ် (Maw Mau Bum) မှ မော်ဝမ်း (Maw Wan) နှစ်ခြင်း ဘုရားကျောင်းသို့ ထွက်ပြေးတိမ်းရှောင် နေသော ဒုက္ခသည် မောင်ဆဂ လအောင် (Saga La Awng) အသက် ၂၀ နှစ်အား စက်တင်ဘာ ၇ ရက် သောကြာနေ့က မြန်မာအစိုးရတပ် ခလရ (၅၁) တပ်မှ နှိပ်စက်ညှင်းဆဲ သတ်ဖြတ်လိုက်ကြောင်း ဒေသခံ တဦး KNG ကချင်သတင်းဌာနသို့ပြောသည်။

၎င်းသည် အိမ်သို့ပြန်မည်ဟုပြောဆိုကာ ခြေလျင်ဖြင့်နေအိမ်သို့သွား နေချိန် ယခုကဲ့သို့ မြန်မာအစိုးရတပ်များ ဖမ်းဆီးနှိပ်စက်ခဲ့ခြင်းဖြစ်ကြောင်း ဒေသခံတစ်ဦးပြောသည်။

“လအောင်က မော်မှော်ဘွမ် (Maw Mau Bum) လမ်းကနေ မပြန်ဘဲ အရမ်းကြောက်ရတဲ့ လမ်းကနေ ပြန်သွားတော့ စိမ်းအောင်ကုမ္ပဏီမှာ ရှိနေတဲ့ အစိုးရတပ်တွေကတွေ့ပြီး စစ်ဆေးမေးမြန်းတယ်။ ဖမ်းပြီး ဆာလာအိတ်ထဲ ထည့်ပြီး နှိမ်စက်ညှင်းဆဲတယ်။ ပြီးတော့ ချောက်ထဲ ပစ်လိုက်တယ်။ သူ့အမေက မပြန်ရဘူးလုိ့တော့ပြောတယ်တဲ့။ သူ့အမေ က ကလေးပိုးထားတော့ သူ့ကို မမှီိလိုက်တာတဲ့” ဟု မျက်မြင်သက်သေ တဦး KNG ကချင်သတင်းဌာနသို့ပြောသည်။

မြန်မာအစိုးရတပ်မှ မောင်လအောင်ကိုဖမ်းဆီး၍ မေးခွန်းများမေးမြန်း ရာတွင် ကောင်းမွန်စွာမဖြေနိုင်သော ကြောင့် ယခုလိုအသတ်ခံရခြင်း ဖြစ်ကြောင်း ဒေသခံများပြောသည်။ ယခုအချိန်ထိ ၄င်း၏ရုပ်အလောင်းကို မတွေ့ရှိသေးသောကြောင့် ဆွေမျိုးများက နှစ်ဖက်တပ်များအား အကြောင်းကြားထားကြောင်း သိရသည်။

မောင်လအောင်သည် ၁၀ တန်း ၂ ကြိမ်ဖြေပြီး ယခုချိန် ကျောက်စိမ်း ရေမဆေးများကောက်ပြီး မိဘကိုကူညီနေကြောင်း သိရသည်။
ယခုချိန် ဖားကန့်ကျောက်စိမ်းမှော်ဒေသတွင် ရှိနေသော မြန်မာအစိုးရ တပ်သည် ပြည်သူလူထုများ သွားလာလှုပ်ရှားနေစဉ် ဖမ်းဆီးစစ်ဆေး သေနတ်ဖြင့်ပစ်ခတ်ခြင်းများရှိနေပြီး စက်တင်ဘာလ ၅ ရက်နေ့တွင် လည်း မော်ဝမ်းဒေသခံ ဦးကရဲန်နော်ကျန်း (Kareng Naw Chyan) အား သေနတ်ပစ်ခတ်မှုကြောင့် သေဆုံးသွားခဲ့သေးသည်။

မော်ဝမ်းနှစ်ခြင်းဘုရားကျောင်းအတွင်း ဒေသခံစစ်ပြေးဒုက္ခသည်များ ၈၆၅ ယောက် ခိုလုံလျက်ရှိပြီး ယခုချိန်အစားအသောက်နှင့် ဆေးဝါးများ၊ နေရာထိုင်ခင်းများအခက်ခဲကြုံတွေ့နေရကြောင်း ကူညီသူတဦး KNG ကချင်သတင်းဌာနသို့ပြောသည်။

Friday, September 7, 2012

ကာကွယ်ရေးဝန်ကြီးဌာန ဒုဝန်ကြီး၏ ပြောကြားချက် မဟုတ်မှန်ကြောင်း KIO တုန့်ပြန်

(KIC)




နိုင်ငံရေးဆွေးနွေးမှုပြုလုပ်ပြီးမှသာ အပစ်အခတ် ရပ်စဲမည်ဆိုသည့် အချက်ကို ကချင်လွတ်မြောက်ရေး အဖွဲ့-KIO က စွဲကိုင်ထားသဖြင့် ကချင်ဒေသတွင် ဆက်လက်တိုက်ပွဲဖြစ်ပွားနေရသည်ဟု ကာကွယ် ရေးဝန်ကြီးဌာန ဒုဝန်ကြီးဗိုလ်မှူးချုပ်အောင်သော် ၏ပြောကြားချက်မှာ မဟုတ်မမှန် ကြောင်း KIO က ယနေ့တုန့်ပြန်ပြောဆိုလိုက်သည်။

KIO ပြောခွင့်ရပုဂ္ဂိုလ် ဦးလနန်က “ကျနော်တို့ အမြဲပြောနေတာကတော့ အခု ဖြစ်ပွားနေတဲ့ တိုက်ခိုက်မှုတွေ ဟာ အဓိကပြဿနာမဟုတ်ဘူး။ တိုင်းရင်းသားအရေးနဲ့ပတ်သက်တဲ့ နိုင်ငံရေးပြဿနာပါ။ ဒီနိုင်ငံရေး ပြဿနာကို အစိုးရအဆက်ဆက်က မဖြေရှင်းနိုင်တဲ့အ တွက် တိုက်ပွဲရ တာပါ”ဟု ပြောသည်။

ဒုတိယ ကာကွယ်ရေး ၀န်ကြီး၏ ရှင်းလင်းချက် အပေါ် လွှတ်တော်မှ စုံစမ်းရန်လို


ရွှေဟင်္သာသတင်းဌာန



အပစ်အခတ် ရပ်စဲပြီးမှ နိုင်ငံရေး ဆွေးနွေး ကြမည် ဆိုသည့် အစိုးရ၏ ငြိမ်းချမ်းရေး မူဟောင်းသည် လက်တွေ့ မကျသဖြင့် နိုင်ငံရေး ဆွေးနွေးမှု ဖြင့်သာ အပစ်အခတ် ရပ်စဲရေးကို လက်မှတ် ထိုးသင့်ကြောင်း အဆိုပြု ခြင်း ဖြစ်သည်ဟု ကချင်ပြည် လွတ်လပ်ရေး အဖွဲ့ ( KIO) ပြောခွင့် ရသူ ဦးလာနန်းက ဆိုပါသည်။ 

“ ကျနော့်တို့က နိုင်ငံရေး ပြသနာကို နိုင်ငံရေးအရ အရင်ဆွေးနွေး ခဲ့ရင် အပစ်အခတ် ရပ်စဲရေးဟာ အလွယ်လေးနဲ့ ပြီးသွား လိမ့်မယ်။ အခုဟာက သူတို့က အပစ်အရင်ရပ် ပြီးမှနိုင်ငံရေး ဆွေးနွေးမယ် ဆိုတဲ့ မူဟောင်းကို ခင်းပြီးတော့ အချိန်ဆွဲ ပေါ်လစီနဲ့ သွားပြီးတော့ အချိန်တခုမှာ နယ်ခြား စောင့်တပ် လုပ်ခိုင်းခဲ့တယ် မဟုတ်လား။ ဒါကြောင့် အစိုးရရဲ့ ငြိမ်းချမ်းရေး ဆွေးနွေးပွဲ အစီစဉ်ကို လက်တွေ့ ကျအောင် အဆိုပြုနေတာပါ” ဟု ဆိုပါသည်။


မိုင်းဖောက်ခွဲမှုကြောင့် မန္တလေး မြစ်ကြီးနား ရထားခရီးစဉ် ရပ်တန့်

သတင်းနှင့်မီဒီယာ ကွန်ယက်။ 



မန္တလေးနှင့် မြစ်ကြီးနား ပြေးဆွဲနေသည့် ရထားသံလမ်း တလျောက်ရှိ တံတားတစ်စင်း ဖောက်ခွဲခံရပြီး ရထားခရီးစဉ်များ ယာယီ ရပ်တန့်နေ ကြောင်း ဒေသခံများက ပြောသည်။

ကချင်ပြည်နယ် မိုးညှင်းမြို့နယ် မော်ဟန်နှင့် ကာဒူ ဘူတာအကြား အစိုးရတပ်နှင့် ကချင်ပြည် လွတ်လပ်ရေး တပ်မတော် (KIA) တပ်ဖွဲ့ဝင် တို့ ယမန်နေ့ ညနေ (၆) နာရီ အချိန်ခန့်က တိုက်ပွဲဖြစ်ပွားခဲ့ပြီး တံတား တစ်စင်း ဖောက်ခွဲခံခဲ့ရသည်ဟု မော်ဟန် ဒေသ ခံတဦးက အခုလို ပြောသည်။



Photo-By -Eleven Media Group Fb

“နမ့်ပင့် တံတား ဖောက်ခွဲခံရတယ်။ ဖောက်ခွဲသံက နှစ်ချက် ကြားရတယ်။ ပစ်ခတ်နေကြ တာတော့ နာရီဝက်လောက် ကြာမယ်။ ဒီကထွက်သွားတဲ့ တရုတ်ရထား မရောက်ခင် အဲဒါကြီး ဖောက်ခွဲ လိုက်တော့ ရထားက ဘူတာကို ပြန်စုန်ခဲ့တာလေ။”  

ကချင်ပြည်နယ်အတွင်း ရထားသံလမ်းတလျောက် တံတားလုံခြုံရေး အဖြစ် ဒေသခံ အစိုးရတပ်ဖွဲ့ဝင်များ စခန်းထိုင် စောင့်ကြပ်လေ့ရှိပြီး ယမန်နေ့ တိုက်ပွဲ အခြေအနေနှင့် ပတ်သက်၍ ၎င်းက အခုလို ဆက်ပြောသည်။

“အဲဒီက စစ်သားလေးက သံလမ်းပေါ်မှာ ရေဒီယိုလေးနားထောင်ပြီး နေတာပေ့ါလေ။ အဲ့ဒီမှာ ပေါက်ကွဲတော့ စစ်သားလေး တယောက်တော့ ပက်လက်လှန်ပြီး ကျသွားတယ်လို့ မြင်တဲ့ သူတွေ ကတော့ ပြောနေကြ တာပဲ။”

ယင်းကိစ္စ မိုးညှင်းမြို့နယ် ရထားကြီးကြပ်ရေးမှူးရုံးမှ တာဝန်ရှိသူတဦးက မိုင်တိုင်အမှတ် (၆၂၁) ရှိ တံတား နံပါတ် (၅၅၅) နေရာတွင် ဖောက်ခွဲခံရပြီး ပျက်စီး ဆုံးရှုံးမှု အခြေအနေ အား အခုလို ပြောဆိုသည်။

“တံတားက ဇလီဖားတုံး ငါးတုံးလောက် ပျက်စီးတယ်။ ရေလည်က တံတားတိုင် အုတ်ခုံ အက်သွားတယ်။ သံလမ်းက လေးပေလောက် ကြွတက်သွားတယ်။ နောက်တံတား ဂါဒါ ခေါ်တာပေ့ါ။ တံတား အုတ်ခုံပေါ်မှာ ခင်းထားတဲ့ သံပေါင်ကြီးပေ့ါ။ အဲဒါက ညာဖက်ခြမ်း သုံးပေလောက် ပဲ့ထွက်သွားတယ်။”

လောလောဆယ် ပျက်စီးမှုများ ပြင်ဆင်နေပြီး မြစ်ကြီးနားမှ စုန်ဆင်း လာသည့် ရထားများ အား အနီးဆုံးနေရာများဖြစ်သည့် မိုးညှင်းနှင့် နမ္မား ဘူတာများတွင် ရပ်ဆိုင်းထားရသလို မန္တလေးမှ ဆန်တက် လာသည့် ရထားများ မော်ဟန်၊ မော်လူး၊ အင်းတော်နှင့် နဘား ဘူတာများတွင် ရပ်ဆိုင်းထားကြောင်း သိရသည်။

မန္တလေး မြစ်ကြီးနား ရထားလမ်းတွင် လူစီးရထားနှင့် ကုန်ရထား တနေ့ လျင် (၁၈) စီးမှ အစီး (၂၀) ခန့် ပြေးဆွဲကြောင်းနှင့် ယနေ့ ညနေ (၃) နာရီ အချိန်ခန့်တွင် ပြင်ဆင်မှုများ ပြီးစီးနိုင်ပြီး ပြန်လည် ပြေးဆွဲနိုင်မည်ဟု ခန့်မှန်းကြောင်း မိုးညှင်းမြို့နယ် ရထားကြီးကြပ် ရေးမှူးရုံးမှ တာဝန်ရှိသူ က ပြောဆိုသည်။

မိုင်းဖောက်ခွဲမှုကိစ္စ ကချင်ပြည်လွတ်လပ်ရေး အဖွဲ့ KIO ထံ ဖုန်းဖြင့် ဆက်သွယ် မေးမြန်းကြည့်ရာ ၎င်းမသိသေးကြောင်း ပြောခွင့်ရပုဂ္ဂိုလ် ဦးလနန်က ပြောဆိုသည်။

အစိုးရ၏ ကာကွယ်ရေးဝန်ကြီး ဗိုလ်မှူးချုပ် အောင်သော်က အစိုးရနှင့် KIA တို့ တိုက်ပွဲ ပြန်လည် ဖြစ်ပွားခဲ့သည့် တနှစ်ကျော် ကာလအတွင်း KIA မှ စစ်ရေးနှင့် မသက်ဆိုင်သည့် အများပြည်သူသုံး လမ်းတံတားများ အား မိုင်းဖောက်ခွဲခြင်း (၆၆) ကြိမ် ပြုလုပ်ခဲ့ကြောင်း ယမန်နေ့က ပြုလုပ်သည့် နေပြည်တော် အစည်းအဝေးတွင် ပြောဆိုခဲ့ သည်ဟု ယနေ့ထုတ် အစိုးရအာဘော် သတင်းတပုဒ်၌ ဖော်ပြထားသည်။  

ယင်းကိစ္စနှင့် ပတ်သက်၍ ကချင်ပြည်နယ် စစ်ဆင်ရေးများအတွင်း စစ်အင်အား အပါအ၀င် ထောက်ပံ့ရေး ပစ္စည်းများ သယ်ယူပို့ဆောင်ရာ၌ လျင်မြန်ချောမွေ့စေရန် အများပြည်သူ သုံးသည့် လမ်းကြောင်းများကို အစိုးရတပ်က အသုံးပြုနေသဖြင့် တံတားအချို့အား ဖောက်ခွဲရခြင်း ဖြစ်သည်ဟု ဦးလနန်က ပြောဆိုသည်။

ထို့အပြင် တိုက်ပွဲ ကာလအတွင်း အစိုးရတပ်ဖွဲ့ဝင်များအား အရပ်ဝတ် များဖြင့် သယ်ယူ ပို့ဆောင်နေပြီး “စစ်ရေးနဲ့ မပတ်သက်တဲ့ လမ်းတံတား ကို ဖျက်တယ်ဆိုတဲ့ နေရာမှာ သူတို့ လည်း စစ်ရေးနဲ့ မပတ်သက်တဲ့ ဒီလမ်းကြောင်းကို မသုံးဖို့ကတော့ လိုပါတယ်ခင်ဗျ။ သူတို့သာ အဲဒီလို အရပ်သားတွေ သုံးတဲ့ လမ်းကြောင်းတွေ ဆက်ပြီး သုံးနေမယ်ဆိုရင် တော့ အဲလိုဟာမျိုးတွေကို ကျနော်တို့ ဖြစ်တဲ့နည်းလမ်းနဲ့ ဟန့်တားတာတော့ လုပ်ရလိမ့် မယ်ခင်ဗျ။” ဟု ၎င်းက ဆက်ပြောသည်။
တဆက်တည်းတွင် အပစ်အခတ်ရပ်ဆိုင်းရေး လုပ်ငန်းစဉ်နှင့် ပတ်သက် ၍ ဆွေးနွေး ညှိနှိုင်းမှု လုံးဝ မပြုလုပ်ဘဲ နိုင်ငံရေးအရ ဆွေးနွေးမှု ပြုလုပ်ပြီးမှသာ အပစ်အခတ် ရပ်စဲမည်ဟူသော အချက်ကို KIA အဖွဲ့က ကိုင်စွဲထားသဖြင့် ဒေသတွင်း တိုက်ပွဲများ ဆက်လက် ဖြစ်ပွားနေရ ကြောင်း ဗိုလ်မှူးချုပ် အောင်သော်က ပြောဆိုခဲ့သည်။

ယင်းကိစ္စ လွန်ခဲ့သည့် (၁၇) နှစ်ကျော် အပစ်အခတ်ရပ်ဆိုင်းရေး ကာလအတွေ့အကြုံများ အရ နိုင်ငံရေး ပြဿနာကို နိုင်ငံရေးနည်းဖြင့် ဖြေရှင်းရန် လိုအပ်ကြောင်းနှင့် “နိုင်ငံရေး တွေ့ဆုံဆွေးနွေးမှု လုပ်ပြီးမှဘဲ အပစ်အခတ် ရပ်ဆိုင်းရေး လက်မှတ်ရေးထိုး ကြမယ် ဆိုတဲ့ဟာက မှားတယ် ခင်ဗျ။ နိုင်ငံရေး တွေ့ဆုံ ဆွေးနွေးမှု အဆင်ပြေ လာတဲ့ အချိန်မှာ ဒီတိုက်ပွဲတွေဟာ အလိုလို ပျောက်ပျယ်သွားလိမ့်မယ်။ အဲလို ပြောတာပါ။” ဟု ဦးလနန်က တုန့်ပြန် ပြောဆိုလိုက်သည်။

လွန်ခဲ့သည့် ၁၉၉၄ ခုနှစ်က အစိုးရနှင့် KIA တို့ အပစ်အခတ်ရပ်စဲခဲ့ပြီး ၂၀၁၁ ခုနှစ် ဇွန်လ (၉) ရက်နေ့ကစတင်၍ တိုက်ပွဲများ ပြန်လည် ဖြစ်ပွား ခဲ့သည်။ တိုက်ပွဲဖြစ်ပွားခဲ့သည့် တနှစ်တာ ကာလအတွင်း မြို့ပေါ် ဒေသ များ အပါအ၀င် တရုတ်မြန်မာ နယ်စပ်ဒေသ များသို့ ထွက်ပြေးခိုလှုံလာ သည့် စစ်ပြေး ဒုက္ခသည်ပေါင်း တသိန်းခန့် ရှိပြီဟု သိရသည်။