Friday, December 14, 2012

ဒီဇင်ဘာလအတွင်း ဆွေးနွေးပွဲများ မဖြစ်နိုင်ဟု UNFC ပြော

(မဇ္ဈိမ) 

 
သမ္မတရုံး ဝန်ကြီး ဦးအောင်မင်း၏ ကမ်းလှမ်းချက်အတိုင်း ဒီဇင်ဘာလအတွင်း ရန်ကုန်မြို့တွင် ငြိမ်းချမ်းရေး ဆွေးနွေးရန် ဖြစ်နိုင်ချေ မရှိသေးကြောင်း ညီညွတ်သော တိုင်းရင်းသား လူမျိုးများ ဖက်ဒရယ် ကောင်စီ (UNFC) က ပြောသည်။

“လက်ပံတောင်းတောင် အရေးကိစ္စမှာ အစိုးရဘက်ကလည်း တော်တော်လေး အကျပ်တွေ့နေတယ်လို့ ကျနော်တို့ သုံးသပ်တယ်။ ကျနော်တို့ဘက်ကလည်း ပြင်ဆင်ထားတာ မရှိသေးဘူး” ဟု UNFC အထွေထွေ အတွင်းရေးမှူး နိုင်ဟံသာ က ပြောသည်။

UNFC ၏ တွဲဖက် အတွင်းရေးမှူး ဗိုလ်မှူးကြီး ခွန်ဥက္ကာ ကလည်း “ဒီဇင်ဘာမှာ တွေ့နိုင်ဖို့ နည်းနည်းကျပ်သွားပြီ။ ဒါပေမယ့် နိုင်ငံရေးက ကြွေတလက် ကြက်တခုန်ပေါ့ဗျာ မပြောနိုင်သေးဘူး” ဟု ဆိုသည်။

နိုဝင်ဘာလ ၉ ရက်နေ့တွင် ပြည်ထောင်စု ငြိမ်းချမ်းရေး ဖော်ဆောင်ရေး အဖွဲ့ ဒု-ဥက္ကဋ္ဌ ဝန်ကြီး ဦးအောင်မင်း ဦးဆောင်သည့်အဖွဲ့နှင့် UNFC ကိုယ်စားလှယ်များ ထိုင်းနိုင်ငံ၊ ချင်းမိုင်မြို့၌ အလွတ်သဘော တွေ့ဆုံပြီးနောက် ရန်ကုန်မြို့ရှိ Myanam Peace Center (MPC)တွင် တွေ့ဆုံရန် ဦးအောင်မင်း က ကမ်းလှမ်းခဲ့သည်။

“ဖိတ်ခေါ်ထားတာကို လက်ခံမလား၊ လက်မခံဘူးလား။ အဲဒါကို ဆွေးနွေးနေတုန်းပဲ။ လက်ခံရင် အကြိုညှိနှိုင်းမှု ဘယ်လို လုပ်မလဲ။ ကိုယ်စားလှယ် ဘယ်လိုရွေးမလဲ။ တရားဝင် ဘယ်တော့ ဆွေးနွေးမလဲ စသည်ဖြင့်ပေါ့ အဲဒါတွေ ပြင်ဆင်ဖို့ လိုပါသေးတယ်။ ကျနော်တို့ ဆွေးနွေးနေတုန်းပဲ” ဟု ဗိုလ်မှူးကြီး ခွန်ဥက္ကာ က ပြောသည်။

ဂျပန်နိုင်ငံ နီပွန် ဖောင်ဒေးရှင်း၏ ကြားဝင်ဆောင်ရွက်မှုဖြင့် UNFC နှင့် ပြည်ထောင်စုအဆင့် အစိုးရ ငြိမ်းချမ်းရေး ကိုယ်စားလှယ်များ ပဏာမ တွေ့ဆုံဆွေးနွေးပွဲကို ကမ္ဘောဒီးယားနိုင်ငံတွင် ကျင်းပကာ ဆွေးနွေးပွဲ ရလဒ်မှတဆင့် ဂျပန်နိုင်ငံတွင် ထပ်မံဆွေးနွေးရန် ယခင်က စီစဉ်ထားခဲ့သည်။ သို့သော်လည်း ထိုအစီအစဉ်ကို ဦးအောင်မင်းက လက်မခံကြောင်း နိုင်ဟံသာ က ပြောသည်။

“သူတို့ အသိုင်းအဝိုင်းက အပြင်မှာ ဆွေးနွေးရတာ သိပ်သဘောမတွေ့ဘူး။ ပြည်တွင်းကို လာပြီး ဆွေးနွေးဖို့ ကမ်းလှမ်းတယ်။ အဖွင့် ပဏာမက Myanam Peace Center မှာ တွေ့ချင်တဲ့သဘော ရှိတယ်။ ကမ္ဘောဒီးယားမှာ ဆွေးနွေးဖို့ ဂျပန်မှာ ဆွေးနွေးဖို့ အဲဒါတွေက ပျက်တော့ မပျက်ပါဘူး။ နောက်ထပ် ဆွေးနွေးဖို့ အများကြီး လိုပါသေးတယ်” ဟု သူက ပြောသည်။

ငြိမ်းချမ်းရေး လုပ်ငန်းစဉ်များကို ၎င်းတို့ အစိုးရသက်တမ်းအတွင်း ပြီးပြတ်အောင် ဆောင်ရွက်သွားလိုကြောင်း သမ္မတရုံးဝန်ကြီး ဦးအောင်မင်းက ထပ်လောင်းပြောဆိုထားသည်။

“၂၀၁၅ ခုနှစ် မတိုင်ခင်တော့ ပြီးအောင် လုပ်ချင်တာ။ ဘာလို့လဲဆိုတော့ ၂၀၁၅ ခုနှစ်ဆို နောက်ထပ်
ရွေးကောက်ပွဲ ပြန်စ ဖြစ်မယ်။ ဘယ်လိုလူတွေ တက်လာဦးမလဲ ကျနော်လည်း မသိဘူး။ သူတို့လည်း နိုင်ငံတော် ဖွံ့ဖြိုးတိုးတက်ရေး၊ ဒေသ ဖွံ့ဖြိုးတိုးတက်ရေး လုပ်မှာပဲ။ သို့သော်လည်းပဲ တစ်က ပြန်စ ရမှာပေါ့ဗျာ။ ဒါကြောင့် မို့လို့လည်း ဒီမှာ ရှိတဲ့ တိုင်းရင်းသား ခေါင်းဆောင်များအနေနဲ့ ကျနော်တို့နဲ့ ပူးပေါင်း ဆောင်ရွက်ပေးပါ” ဟု ချင်းအမျိုးသား တပ်ဦးနှင့် ဒုတိယအကြိမ် ငြိမ်းချမ်းရေး ဆွေးနွေးပွဲ အဖွင့်မိန့်ခွန်း၌ ဒီဇင်ဘာလ ၇ ရက်နေ့က ထည့်သွင်း ပြောကြားခဲ့သည်။

လက်ပံတောင်းတောင် သပိတ်စခန်း အကြမ်းဖက် ဖြိုခွင်းခံရခြင်းနှင့် ပတ်သက်ပြီး ‘အကြမ်းဖက် လုပ်ရပ်သည် တိုင်းတပါး အကျိုးစီးပွားနှင့် တပ်မတော်ပိုင် အကျိုးစီးပွားကိုသာ အကာအကွယ် ပေးပြီး ပြည်သူလူထု အကျိုးစီးပွား အား လုံးဝ မျက်ကွယ်ပြုခြင်း ဖြစ်သည်’ ဟု တိုင်းရင်းသား လက်နက်ကိုင်အဖွဲ့ ၆ ဖွဲ့ဖြင့် ဖွဲ့စည်းထားသည့် UNFC က ကြေညာချက် ထုတ်ပြန်ခဲ့သည်။

ထိုကြေညာချက်သည် လက်ရှိ အစိုးရနှင့် တပ်မတော်ကို ရည်ညွှန်းပြောဆိုခြင်း ဖြစ်သော်လည်း ငြိမ်းချမ်းရေး
ဆွေးနွေးမှုအတွက် အဟန့်အတား မရှိနိုင်ကြောင်းလည်း ဗိုလ်မှူးကြီး ခွန်ဥက္ကာ က ပြောသည်။

“ဒီလိုဆွေးနွေးတာကလည်း မိတ်ဆွေတွေ ဆွေးနွေးတာမှ မဟုတ်ဘဲ။ မတည့်တဲ့လူ တယောက်နဲ့တယောက်
သေနတ်နဲ့ ပစ်နေတဲ့ ရန်သူတွေပဲ။ ဆွေးနွေးဖို့ လိုရင် ထိုင်ဆွေးနွေးတာပဲ။ ပစ်ဖို့လိုရင် ပစ်တာပဲ။ Statement (ကြေညာချက်) လောက်နဲ့တော့ အဟန့်အတား မဖြစ်ပါဘူး” ဟု ဆိုသည်။

မေလ ၃ ရက်နေ့တွင် တင်ကြိုချမှတ်ထားသည့် အချက် ၈ ချက်ပါ ‘ပြည်ထောင်စုအဆင့် ငြိမ်းချမ်းရေး ဆွေးနွေးခြင်း’ အစိုးရဘက်က ထုတ်ပြန်ခဲ့သည်။ ၎င်းတို့အနက် ပထမအချက် ၄ ချက်ကိုသာ UNFC အနေနှင့် အငြင်းပွားဖွယ် မရှိဟု ဆိုပြီး ကျန်သည့် အချက် ၄ ချက်ကို သေချာစွာ လေ့လာဆန်းစစ်ပြီး နှစ်ဦးနှစ်ဖက် အကျေအလည် ဆွေးနွေးရန် လိုသေးကြောင်း UNFC က ဆိုသည်။

၎င်းတို့မှာ ပါတီထောင်၍ ရွေးကောက်ပွဲ ဝင်ရေး၊ ဖွဲ့စည်းပုံ အခြေခံ ဥပဒေကို လက်ခံရေး၊ ဥပဒေဘောင်အတွင်း အပြီးအပိုင် ဝင်ရေးနှင့် တခုတည်းသော လက်နက်ကိုင် အဖွဲ့အစည်းအဖြစ် အသွင်ကူးပြောင်းရေးတို့ ဖြစ်သည်။

UNFC က ကြီးမှူးပြီး စက်တင်ဘာလ အတွင်းတွင် ၃ ရက်ကြာ တိုင်းရင်းသား ညီလာခံတခုကို ထိုင်းနိုင်ငံတွင် ကျင်းပခဲ့ပြီး တနိုင်ငံလုံး အတိုင်းအတာဖြင့် အပစ်အခတ် ရပ်စဲရေးကို အစိုးရက တရားဝင် ကြေညာပေးရေး၊
နိုင်ငံရေးအရ ဆွေးနွေးပွဲများ ဆက်လက် ဖြစ်ပေါ်လာရေး၊ ပင်လုံကဲ့သို့ ညီလာခံတခု ပေါ်ပေါက်ရေး၊ ငြိမ်းချမ်းရေး လုပ်ငန်းစဉ်တွင် နိုင်ငံတကာ လေ့လာရေး အဖွဲ့များ ပါဝင်ခွင့် ရှိရေး စသည့် အချက် ၆ ချက် ပါဝင်သည့် ပြည်တွင်း ငြိမ်းချမ်းရေး လုပ်ငန်းစဉ်များ အတွက် လမ်းပြမြေပုံတခုကို ချမှတ်ခဲ့သည်။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။