Sunday, December 23, 2012

PANG LUNG GA SHAKA HTE KACHIN MYU SHA

(Jinghpawkasa)

Mung hpawm myen mung ngu nna shabyin dat ai rudi  Panglung ga shaka hpe  amyu Kachin, Shan , Chin ni hte laga bum nga masha ni chyu sha ya dai ni du hkra aja awa manu shadan ding yang rai nga ai, dai zawn manu shadan taw nga ai gaw munghpawm myen mung hpe ga garan mat na hpe n’myit ai  sha grau nna ngang kang bawng ring wa na hpe ra sharawng ai majaw rai nga ai.
 


Kachin myu sha ni hpe munghpawm kaw na garan pru na  matu gumlang hpyen galaw ni, munghpawm hpe jahten sharun galaw nga ai ni ngu  mungkan ting bra chyam hkra shani shana tsun ndau galaw taw nga ai mung masa galaw ai myen ni hte hpeyn asuya  ni sha, mung hpawm myen mung hpe shabyin dat ai rudi panglung ga shaka hpe nyet kau, jahten kau di nna simsa ngui pyaw ai munghpawm ajet nbyin wa hkra jahten shabyak galaw nga ma ai re. Kachin amyu ni munghpawm myen mung kaw nna garan pru mat na nkam tim garan pru nga mat mayu hkra gasat shamyit majan galaw taw nga ai gaw myen hpyen asuya ni she rai nga ai nre yi? Shanhte ni dai ladat ni hte sha mungmasa galaw nga  yang gaw ganing rai sim sa ai mungdan, bawngring ai mungdan byin wa lu na rai ta.

Mung masa galaw nga ai  myen masha ni Panglung ga shaka hpe manu nshadan nyet taw nga ding yang galaw nga yang gaw   munghpawm myen mung ngu  ai hpe mung dawm kau nna  moi 1947 ning Paang lung ga shaka rai n’galaw hkat ai aten na mung masa sat lawat hku sha bai nga mat saga ngu nna ja ja tsun shaga ra wa saga ai.

Thein Sein asuya jai lang taw nga ai, 2008 ning hta myen hpyen asuya ni chyu sha myit hkrum nna jawm ka shagrin da ai constitution hpe munghpawm democracy mungdan a constitution re ngu hta 1947 ning e Kachin, Shan, Chin hte Myen ni jawm myit hkrum nna ga shaka da ai  PangLung constitution hta shalawm da ai tara upadi ni hpe gaw bai ka bang shalawm da ai nnga nga ai. Myen amyu masha ni a matu akyu rawng ai baw upadi ni hpe rai jang gaw 1947 ning ndu shi yang na  shanhpraw ni shanhte myen ni a mungdaw hta up sha ai hta lang ai tara upadi ni hpe bai rai jang gaw ya du hkra akyu jashawn jai lang nga ma ai.

Kachin myu sha ni hpe laknak kaba, kaji, nbungli ni hte laja lana gasat mat wa ai gaw  lahkawng ni du mat wa tim dang kau lu ai nnga, sum agrawp ai chyu law nga  ai majaw gasat dang la lu na nre hpe chye wa manu ai. Dai majaw mung masa bawngban ga ngu nyan galaw wa nga masai. Mung masa bawngban ai gaw kaja nga ai, rai yang bawng ban sa wa na mung masa agenda ni hpe mungdan masha yawng chye hkra hpa majaw madun ndau shabra ai lam n’galaw ai,  hpa majaw international kaw na sak-se tai ya na ni shalawm nna nlu bawngban ai? Mung masa bawng ban zuphpawng hpe shawa yawng mu lu chye lawm ai hku nna hpa majaw n’galaw ai, hpa majaw magyim ai hku nna sha galaw mayu ai law? dai zawn re ladat gaw bawngban sa wa na mung masa ginlam ni ntsa e myit hpraw san ai lam nnga pale palau re tara ai hku galaw na nmyit ai majaw rai nga ai. Myen amyu mung masa galaw ai ni gaw  nshawp nkap, pale palau re mung masa hpe shaning 60 ning ladaw du hkra galaw sha lu wa ai majaw matut nna mung naw galaw sha lu ra ai ngu ai mung masa myit jasat rawng nga ma ai.


Ya kaw nna myen hpyen asuya hte mung masa ginlam ni tsun shaga bawngban ai lam galaw wa ai hta ningbaw tai na Kachin myu sha ni gaw, Kachin amyu ni mung hpawm gaw de wa ai hta bang da ai  mung masa arang, mung hpawm a matu ap nawng galaw lai wa sai a mjaw lu la ra ai mung masa akyu ara ni hpe lu hkra shagrit shanyem ai sat lawat hpe tsep kawp nlang ai sha magrau grang ja ja rai nna tsun shaga la ra saga ai law.
M. Zau Hkum

No comments:

Post a Comment

Comment မ်ားကုိ စီစစ္ျပီး တင္ေပးပါမည္။ မုိက္ရုိင္းေသာ၊ လူသားမဆန္ေသာ Commet မ်ား တင္မေပးပါ။