တိုင်းရင်းသား လူနည်းစု သုတေသနအဖွဲ့ရဲ့ စစ်ရေးသုံးသပ်ချက်

(Dr. Lun Swe Blog)

ဒီနေ့ အချိန်ကာလမှာ KIA လိုင်ဇာ ကျသွားခြင်း၊ မကျဆုံးသွားခြင်းဟာ ကမ္ဘာရော မြန်မာပါ စိတ်ဝင်စားသည့် ကိစ္စ ဖြစ်လာမှာ အသေအချာပါ။

သတင်းအရလည်းကောင်း မြေပုံပေါ်မှာ ကြည့်ပြီး သုံးသပ်ကြရင် ၁၈ မိုင်အကွာမှာ ရင်ဆိုင်နေကြရပါသည်။ ပြောက်ကျားစစ်နှင့် လည်းကောင်း၊ မိုင်းစစ်ဆင်တိုက်ခိုက်နည်းနှင့် လည်းကောင်း၊ လှုပ်ရှားစစ် အဆင့်နှင့် လည်းကောင်း၊ ခွဲ စ/က ဖြန့်ခွဲ လှုပ်ရှားတဲ့နည်းနှင့် လည်းကောင်း ရင်ဆိုင်တိုက်ခိုက်နေကြတာဖြစ်ပါသည်။ စိတ်လှုပ်ရှားစရာလည်း ဖြစ်ကောင်းဖြစ်မယ်၊ ဒါပေမယ့် စစ်ရေး အတွေ့အကြုံ ဖြတ်သန်းမှုရှိတဲ့ ရဲဘော်များအတွက် အထူးအဆန်း မဟုတ်ပါ။

တော်လှန်ရေးကာလမှာ စစ်သေနင်္ဂဗျူဟာအရ စစ်နည်း ပရိယာယ်အရ ကျွမ်းကျင်ပေါ့ပါးစွာ စစ်ကစားနေရမှာပဲ ဖြစ်ပါသည်။ ခံစစ်၊ ခံစစ်ရှင်ဆိုတာ ရှိနေမှာပဲ ဖြစ်ပါသည်။

ခံစစ်ရှင်ဆိုတာ တဘက်က သက်ရှိအင်အားကို ဘယ်လောက် ချေမှုန်းပြီးမှ ဆုတ်ခွာပေးရတာ စသည့် စစ်ရေး အစီအမံ ရေးဆွဲထားတာ။ ဆိုလိုတာက ဘယ်လောက်ဈေးနှင့်ရမှ ရောင်းတာ။ ပြောရရင် ကြိုက်ဈေးရမှ ရောင်းတာမျိုး။

KIA ခေါင်းဆောင်များဟာ ပြည်တွင်းစစ် အတွေ့အကြုံရှိတဲ့ ခေါင်းဆောင်တွေပါ။ ကျနော်တို့လေ့လာ သိရှိရသလောက် ပထမ လိုင်ဇာ၊ ဒုတိယ လိုင်ဇာ၊ တတိယ လိုင်ဇာ ပြင်ဆင်မှု ရှိထားပြီးသားပါ။ ခံစစ်သေ ကျင့်သုံးမှာ မဟုတ်ပါ။ အဆမတန် တန်ရာ တန်ဖိုးရယူပြီးမှ အပေးအယူ ရှိနေမှာပါ။ အလကားတော့ပေးမှာ မဟုတ်ပါ။ ပထမ လိုင်ဇာ ကျခဲ့ရင်လည်း KIA အတွက် နိုင်ငံရေးအရ စစ်ရေးအရ အရှုံးမရှိပါ။ ဒါပေမယ့် ကြံ့ဖွတ်တပ်အတွက်တော့ လိုင်ဇာရဖို့ သိပ်ပြီး လွယ်ကူတဲ့ ကိစ္စတော့ မဟုတ်ပါ။

အခု KIA သုံးနေတဲ့ မိုင်းစစ်ပွဲဟာ အနှစ် ၆၀ ပြည်တွင်းစစ်ရဲ့ အတွေ့အကြုံ၊ တရုတ်ပြည် ဂျပန်ခုခံရေး အတွေ့အကြုံ၊ ယခုခေတ် နောက်ဆုံးပေါ် အဝေးထိန်းစနစ်နဲ့ ဖောက်ခွဲတဲ့မိုင်း၊ ဒါကြောင့် ထိရောက်မှု ရှိနေတာ ဖြစ်ပါသည်။ တွဲဖက်ထားတဲ့ မိုင်း - တကယ် ကောင်းရင် စက အလိုက် ထိခိုက်ကျဆုံးမှု ရှိနိုင်သည်။ ဒါကြောင့် လိုင်ဇာ ကျဆုံးသည် မကျဆုံးသည် မေးတာထက် ကြံ့ဖွတ် ဦးသိန်းစိန်အစိုးရ ဗျူဟာမှူး ဘယ်နှစ်ဆယ်၊ စကမှူး ဘယ်နှစ်ရာ၊ အရာရှိငယ် တပ်မှူး တပ်သား ဘယ်နှစ်ထောင် အကျခံပြီး ယူမှာလဲ မေးရင် ပို ပြည့်စုံ ပါလိမ့်မည်။

ဒီနေ့ KIA စစ်မျက်နှာမှာ ကျဆုံးမှုဟာ ပြည်တွင်းစစ်သမိုင်းမှာ အများဆုံး ကျဆုံးမှုပါ။  တစ်နှစ်တာ တိုက်ပွဲ KIA နှင့် သိန်းစိန်အစိုးရ တိုက်ပွဲ အကြိမ်ပေါင်း ၂၀၀၀ ကျော်ပြီး ဦးသိန်းစိန်ကျောထောက်နောက်ခံ Myamar Express သတင်းအရ KIA အရာရှိ ၂၆၀ - စုစုပေါင်း အားလုံး ၂၀၀၀ အကျအဆုံး ရှိတယ်လို့ ဖော်ပြထားသည်။

တကယ်လက်တွေ့မှာ ၁ အချိုး ၁၀ အကျအဆုံး ရှိသည်။ ဦးသိန်းစိန် အစိုးရ စစ်တပ်ကျဆုံးမှုဟာ ၁၀၀၀၀ ကျော်သွားပါပြီ။ တနည်း ပြောရရင် မလိုလားအပ်တဲ့ ဆုံးရှုံးမှုပါ။ ကျဆုံးမှု အပေါ် ကြံ့ဖွတ်တပ်အတွင်း မိသားစုများ၊ ၄င်းတို့ ဆွေမျိုးမိသားစု အသိုင်းအ၀န်းများ မကျေမနပ် ဖြစ်လာပြီး အင်အားစု အဖြစ်ဖွဲ့လာပြီး အသက်သွေးချွေး အကြွေးတောင်းခံလာမှာ မလွဲပါ။ ကျဆုံးသွားသော တပ်မှူး တပ်သားများရဲ့ သားသမီး/ ဇနီးသည်များ မိအိုဖအိုများဟာ ကျဆုံး သွားသော တပ်မှူးတပ်သားများ၏ အသက်လျော်ကြေးကို ခံမပေးသည့်အပြင် အလွဲသုံးစားခြင်းခံရတာ၊ စခန်းမှနေ မောင်းထုတ်ခံနေတာ ရှိနေတဲ့အတွက် မကျေမနပ်ဖြစ်နေတာတွေ များပြားလာပါသည်။ ပိုမိုရှုပ်ထွေးလာပါသည်။

တပ်ရင်းမှူးများ၊ ဗျူဟာမှူးများ၊ စကခမှူးများ တချို့အခြေအနေဆိုးနေတာကို သိရှိတဲ့အတွက် စစ်ဆရာဝန်တွေကို လာဘ်ထိုးပြီး စီပိုးဆေးလက်မှတ်နှင့် ထွက်လာတာ၊ AIDS လေးလုံးရောဂါ အကြောင်းပြပြီး ထွက်တာများလာတာ သိရသည်။

ကြံ့ဖွတ်အစိုးရတက်လာပြီး ပြည်တွင်း စစ်ပြေးဒုက္ခသည်၊ ရခိုင် - မွတ်ဆလင် ဒုက္ခသည် အမြောက်အများရှိလာတာ၊ ယခင် သိန်းဂဏန်းမှ ယခု ၃ သိန်းကျော်သွားပြီ ဖြစ်ပါသည်။ လက်နက်ကိုင် တပ်မတော်သားလည်း ပြည်တွင်း စစ်သမိုင်းမှာ အများဆုံး ကျဆုံးမှု လည်းဖြစ်ပါသည်။

ကြံ့ဖွတ်အစိုးရ တက်လာပြီး ဗမာပြည်မှ ထွက်လာတဲ့ မူးယစ်ဆေးဝါး အရေအတွက်ကလည်း ကြောက်ခမန်းလိလိ အိမ်နီးချင်း နိုင်ငံများမှ ဖမ်းမိတာ ရှိလာခဲ့ပါသည်။ ပြည်တွင်း စစ်ရပ်စဲရေး၊ ပြည်တွင်း ငြိမ်းချမ်းရေး အကောင်အထည် မဖော်နိုင်ခဲ့ရင် တိုင်းပြည် အခြေအနေ ပိုပြီး ဆိုးဝါးလာမှာပဲ ဖြစ်သည်။

ပြည်တွင်း စစ်ရပ်စဲရေး၊ ပြည်တွင်း ငြိမ်းချမ်းရေး တည်ဆောက်ရေးဟာ တခုတည်းသော ဦးသိန်းစိန်အစိုးရရဲ့ ထွက်ပေါက်သာဖြစ်ပြီး အကောင်အထည် မဖော်နိုင်ပါက ကုလသမဂ္ဂ UN နှင့် အနောက်နိုင်ငံ အစိုးရများ၊ အနိုင်နိုင်ငံ ပြည်သူများနှင့် ဗမာပြည်သူလူမျိုးပေါင်းစုံ ပြည်သူများရဲ့ ဖြူစင်တဲ့ မေတ္တာ စေတနာ မျှော်လင့်ချက် လက်လွတ်ဆုံးရှုံးရမှာပဲ ဖြစ်သည်။

နိုင်ငံတကာ အားပေးကူညီမှုနှင့် အမျိုးသား ပြန်လည်သင့်မြတ်ရေး ပူးတွဲ အကောင်အထည်ဖော်နိုင်မှသာ မိမိနိုင်ငံဟာ ရှေ့သို့ တလှမ်းလှမ်းနိုင်မှာ ဖြစ်ပြီး ကမ္ဘာ့နိုင်ငံများနှင့် တဖြည်းဖြည်း ရင်ဘောင်တန်းနိုင်မှာ ဖြစ်သည်။