Wednesday, December 19, 2012

ဒီဇင်ဘာ (၁၉) ရက် မနက်ပိုင်း အထိ ပြည်တွင်းစစ် အခြေအနေ

(Myitkyina blog)



စစ်ဆင်ရေး စီမံချက်ဆုံးရှုံးသော ဒီ(၁၄)

ဒီဇင်ဘာလမှစတင်လာသော မြန်မာ့တပ်မတော်၏ ထိုးစစ်သည် အထိ အခိုက် အကျအဆုံးများနှင့် ရင်ဆိုင်နေရ သည်။ ယခင်တပ်မ(၈၈) တပ်မ မှူးဟောင်း ဗိုလ်မှူးချုပ်ထွန်းထွန်းနောင် က မြောက်ပိုင်းတိုင်းစစ်ဌာနချုပ် တိုင်းမှူး တာဝန်ကို ပြောင်းလွှဲယူပြီးသည့်နောက်ပိုင်းတွင် ထိုးစစ်ဆင် တိုက်ခိုက်မှု ခပ်စိပ်စိပ်ရှိလာကာ တိုက်ပွဲသည် လည်း ပြင်းထန်လာခဲ့ သည်။ ပွင့်လင်းရာသီကာလအတွင်း KIA ၏ အဓိကအချက်အချာဖြစ် သော တပ်စခန်းများ ကို သိမ်းပိုက်နိုင်ရေးအတွက် ကာကွယ်ရေး ဦးစီးချုပ်ရုံးမှ အစီအမံများကို ညွှန်ကြားလျက်ရှိသည်။

ထိုးစစ်ဆင်တိုက်ခိုက်လာသော မြန်မာ့တပ်မတော်ကို KIA တပ်ဖွဲ့နှင့် ABSDF ကျောင်းသားတပ်မတော်တို့က ရွံ့ရွံ့ချွန်ချွန်ခုခံတိုက်ခိုက်နေ သဖြင့် စစ်ဆင်ရေးစီမံချက်များ အရှုံးနှင့်ရင်ဆိုင်နေရသည်။
မြန်မာ့တပ်မတော်၏ ဒီဇင်ဘာလ(၁၄)ရက် (ဒီ-၁၄)စီမံချက်သည် မြောက်ပိုင်းတိုင်းစစ်ဌာနချုပ် တိုင်းမှူး ဗိုလ်မှူးချုပ် ထွန်းထွန်းနောင် အတွက် အကြီးမားဆုံးထိုးနှက်မှု ဖြစ်ခဲ့ရသည်။ ၎င်းစစ်ဆင်ရေးတွင် စကခ(၃) လက်အောက်ခံ ခမရ(၃၈၁) (၃၈၃) (၃၈၉) ခလရ(၄၀) ပူးပေါင်းအင်အား(၃၆၀) နှင့် ဒီဇင်ဘာလ(၁၄)ရက် မနက်(၃)နာရီ အချိန်မှ ထိုးစစ်စတင်ကာ တိုက်ပွဲသည် မနက်(၆)နာရီအချိန်မှစတင်ကာ ညနေ(၅)နာရီခွဲအထိ ကြာမြှင့်ခဲ့သည်။ ဒီ(၁၄) လဂျားယန်တိုက်ပွဲတွင် မြန်မာ့တပ်မတော်မှ ကြည်းတပ်အပြင် မြန်မာ့လေတပ်ကပါ ၀င်ရောက် တိုက်ခိုက်ပစ်ခတ် ပါဝင်ခဲ့သည်။


မိုးကောင်းမြို့အခြေစိုက် စကခ(၃)မှ တပ်တွင်းသတင်းရပ်ကွက် အဆို အရ တိုက်ပွဲတွင် မြန်မာ့တပ်မတော် ဘက်မှ ထိခိုက်ဒဏ်ရာရသူနှင့် ကျဆုံးသူပေါင်းအားလုံး(၁၃၀)ခန့် ရှိခဲ့ကြောင်း သိရှိရသည်။ ထိခိုက် ဒဏ်ရာရသူ တွင် အရာရှိအဆင့်(၁၁)ဦးခန့် ပါဝင်ကြောင်း သိရှိရသည်။


ဒဏ်ရာရ အရာရှိများမှာ -
ဒုတိယဗိုလ်မှူးကြီး ဇော်မိုးသန့်
ဗိုလ်မှူး ညွှန့်လှိုင်
ဗိုလ်မှူး ရဲကျော်
ဗိုလ်မှူး ကျော်ကျော်သက်
ဗိုလ်ကြီး ရဲရင့်လင်း
ဗိုလ်ကြီး မျိုးမင်းစိုး
ဗိုလ်ကြီး သန်းဇော်အေး
ဗိုလ် အောင်ဖြိုး
ဗိုလ် သန့်ဇင်ဦး
ဗိုလ် သန်းနိုင်ထွန်း
ဗိုလ် အောင်ကျော်မိုး
တို့ဖြစ်ကြကြောင်း သိရှိရသည်။

KIA ရှေ့တန်းသတင်းရပ်ကွက်အရ သိရှိရသည်မှာ မြန်မာ့တပ်မတော် တပ်သား ကျဆုံးသူအပေါင်း (၁၆)လောင်းကို ရရှိခဲ့ကြောင်းနှင့် ဒဏ်ရာ ရရှိကျန်ရစ်သူ(၇)ဦးကို လက်ရဖမ်းဆီးရကြောင်း သိရှိရသည်။ ဒဏ်ရာ ရသူထဲမှ တပ်သား အောင်အောင် သည် ဆေးကုသခံယူစဉ် ဒဏ်ရာ ပြင်းထန်သဖြင့် ဒီဇင်ဘာလ (၁၅)ရက်နေ့တွင် သေဆုံးသွားကြောင်း သိရှိရသည်။
  

ဆေးထိုး၍အဆုံးစီရင်ခံရသူ

ထိခိုက်ကျဆုံးမှုများသဖြင့် စစ်ကြောင်းကို နောက်ဆုတ်ရန် အမိန့်ရ သောအခါ ဒဏ်ရာဖြင့်လိုက်ပါနိုင်ခြင်း မပြုနိုင်သူများကို ပစ်ခတ်သတ် ဖြတ်ထားခဲ့ရန် ညွှန်ကြားမှုရှိကြောင်း ချန်ရစ်ခံခဲ့ရသူများမှ သိရှိရသည်။ ရဲဘော်စိတ်ရှိသော တပ်သားအချို့၏ သနားကြင်နာစိတ်ရှိသူအချို့ ကြောင့် အသက်ရှင်သန်ခွင့် ရခဲ့ကြောင်း ဒဏ်ရာဖြင့်ကျန်ရစ်သူများ၏ ပြောကြားချက်မှ သိရှိရသည်။ သေဆုံးသူအချို့သည် အထက်အမိန့်အရ ပစ်ခတ်သတ်ဖြတ်ခြင်း ခံခဲ့ရသည်။ အချို့မှာမူ ဆေးထိုး၍ အဆုံးစီရင် ခံခဲ့ရသည်။

ထိခိုက်ဒဏ်ရာရ၊ သေဆုံးမှုများရခြင်းမှာ ဒေါ့ဖုန်းယန် အမြောက် တပ်ရင်းမှ ပစ်ခတ်သော ၁၀၅ မမ အမြောက် ကျည်များ ရှေ့တန်း စစ်မျက်နှာပြင်တွင် ပိတ်မိနေသော မြန်မာအစိုးရစစ်တပ်ဖွဲ့ဝင်များကို ထိမှန်သောကြောင့် ဖြစ်ကြောင်း သိရှိရသည်။ 
ဒီ(၁၄)တိုက်ပွဲတွင် မြန်မာအစိုးရစစ်ကြောင်းမှ ပရမ်းပတာ ဖရိုဖရဲ တပ်ဆုတ်ပြေးစဉ် ကျန်ရစ်ပစ်ထားခဲ့သော စစ်အသုံးအဆာင်ပစ္စည်းများ၊ လက်နက်၊ ကျည်မျိုးစုံ၊ လက်နက်ကြီးကျည်မျိုးစုံကို အများအပြားသိမ်းဆည်း ရခဲ့သည်။



ဒီ(၁၄) စစ်ဆင်ရေးစီမံချက်တွင်ပါဝင်သော အရာရှိအားလုံးနည်းပါး ထိခိုက်ဒဏ်ရာရရှိကာ ပါဝင်သောအင်အား ၏ ထက်ဝက်ခန့်ကို ဖြုန်းတီး လိုက်ခဲ့ရသော စစ်ဆင်ရေး ဖြစ်ခဲ့ရသည်။

 ဤသည်မှာ တိုင်းမှူးတာဝန်ယူ နေသော ဗိုလ်မှူးချုပ်ထွန်းထွန်းနောင်၏ တဇွတ်ထိုးဆုံးဖြတ်ချက်ကြောင့် တပ်မတော်သားများ သေဆုံးဒဏ်ရာရကြကာ၊ ယင်းတို့၏ သိုက်ဆိုင် သော မိသားစုဝင်များအတွက် ပျော်ရွှင်သော မိသားစုဘ၀ ပျက်ပြား စေခဲ့ပြီ ဖြစ်ပေသည်။

မြန်မာစစ်တပ်က ဖမ်းဆီးခံရသူကို ပစ်ခတ်သတ်ဖြတ်


ရှမ်းပြည်မြောက်ပိုင်း၊ ကွတ်ခိုင်မြို့နယ် နမ်ဖလွမ်(Nam Hpalun) ဒေသတွင် ဒီဇင်ဘာလ(၁၆)ရက်နေ့က  KIA တပ်ရင်း(၉)မှ တိုက်နယ် ဒုတိယအုပ်ချုပ်ရေးမှူး ဆလန်ကဘာမခေါ်ယော် (Salang Kaba Mahkaw Yaw) နှင့် အုပ်ချုပ်ရေးရုံးစာရေး တို့ကို ခလရ(၂၉၀)တပ်ဖွဲ့ များက ဖမ်းဆီးခဲ့ကြောင်းသိရသည်။
ဖမ်းဆီးခံရသော ဆလန်ကဘာ မခေါ်ယော် ကို ခလရ(၂၉၀)တပ်ဖွဲ့ ၀င်များ ပစ်ခတ်သတ်ဖြတ်ခဲ့သည်။ အတူအဖမ်းခံရသော အုပ်ချုပ်ရေး ရုံးစာရေး မှာမူ ထွက်ပြေးလွှတ်မြောက်ခဲ့ကြောင်း သိရှိရသည်။
KIA တပ်ဖွဲ့က ဖမ်းဆီးမိသော အစိုးရတပ်ဖွဲ့ဝင်များကို ကောင်းမွန်စွာ ဆက်ဆံ၍ လိုအပ်သည်များကို ပံ့ပိုးပေးလျက်ရှိသော်လည်း မြန်မာအစိုးရ စစ်တပ်က ဖမ်းဆီးရမိသော KIA တပ်ဖွဲ့ဝင်များမှာမူ ပစ်ခတ် သတ်ခြင်း ကို အစဉ်ခံနေရသည်။

လက်နက်ကြီးဖြင့် ပစ်ခတ်တိုက်ခိုက်

ခန်းကိုင်တောင်
ဒေါ့ဖုန်းယန်မြို့ ခန်းကိုင်တောင်အခြေချ အမှတ်(၃၆၇)အမြောက် တပ်ဖွဲ့က ဒီဇင်ဘာလ(၁၈)ရက်နေ့တွင် နံနက်(၁၀)နာရီမှ မွန်းလွဲ(၂) နာရီအထိ ၁၀၅ မမ အမြောက်ကြီးဖြင့် လဂျားယန်ကျေးရွာဘက်သို့ (၁၅)ကြိမ်ခန့် ပစ်ခတ်တိုက်ခိုက်ခဲ့သည်။

ပန်ဝါဒေသ မြန်မာအစိုးရ အရေးပါတပ်စခန်းလက်လွှတ်

 ဒီဇင်ဘာလ(၁၈)ရက်နေ့ မွန်းတည့်(၁၂)နာရီအချိန်တွင် ပန်ဝါဒေသ နယ်ခြားမှတ်တိုင်(၆)အနီး ခလရ(၇၇)နှင့် ခမရ(၁၃)တပ်ဖွဲ့ဝင်များ တပ်စွဲထားသော သံချောင်းစခန်းကို KIA တပ်ဖွဲ့ဝင်များ ၀င်ရောက် သိမ်းပိုက်နိုင်ခဲ့ ကြောင်း သိရှိရသည်။ အင်အား(၁၀၀)နီးပါးရှိသော အစိုးရတပ်ဖွဲ့ဝင်များ ထိခိုက်ဒဏ်ရာရရှိကာ ကစင့်ကလျား ဆုတ်ခွာ ထွက်ပြေးခဲ့ရကြောင်း သိရှိရသည်။


ယင်းတပ်စခန်းမှ ဆွီဒင်နိုင်ငံထုတ် ၈၄ မမ M-3 Carl Gustav ကျည်(၄) လုံး၊ RPG လောင်ချာဒုံးသီး(၅)လုံးနှင့် အခြားလက်နက်ကျည် အများ အပြားကို သိမ်းဆည်းရမိကြောင်း သိရှိရသည်။
မြန်မာအစိုးရတပ်ဖွဲ့သည် သံချောင်းတပ်စခန်းမှနေ၍ ဒုက္ခသည်စခန်းသို့ လက်နက်ငယ်၊ လက်နက်ကြီးများဖြင့် ပစ်ခတ်လေ့ရှိသဖြင့် ဒုက္ခသည်များ အတွက် လုံခြုံမှုကိုကင်းမဲ့စေသော တပ်စခန်းဖြစ်သည်။ လွန်ခဲ့သည့် စက်တင်ဘာလ ကလည်း အသက်(၅)နှစ်အရွယ် ကလေးငယ်တစ်ဦး သည် လက်နက်ကြီးကျည်ဖြင့် ပြင်းထန်စွာဒဏ်ရာရရှိခဲ့ သည်။

အောင်ဂျာတိုက်ပွဲ (၁၀)ဦးထိခိုက်
 ဒီဇင်ဘာလ(၁၈)ရက် မွန်းလွဲ(၂)နာရီအချိန်တွင် ၀ိုင်းမော်မြို့နယ်၊ KIA တပ်ရင်း(၃)ဒေသ အောင်ဂျာကျေးရွာ တွင် စစ်ဆင်ရေးလှုပ်ရှားနေသော စစ်ကြောင်း (ခမရ-၃၈၅ ဟု ယူဆရသော) အင်အား(၄၀)ခန့်ကို KIA တပ်ဖွဲ့ ၀င်များ မိုင်းဖြင့် တိုက်ခိုက်ရာ မြန်မာအစိုးရတပ်ဖွဲ့ဝင်(၁၀)ဦးခန့် ထိခိုက်ပြုန်းတီးသွားခဲ့ကြောင်း သိရှိရသည်။

ခလရ(၅၈)တပ်ဖွဲ့များ ကျဆုံးများ
 ဆဒုံးမြို့နယ်၊ ဘွမ်တောင်(Bum Tawng)တွင် အခြေပြုလှုပ်ရှားနေသော ခလရ(၅၈)တပ်ဖွဲ့ဝင်များကို KIA တပ်ရင်း(၃) တပ်ဖွဲ့ဝင်များက ဒီဇင်ဘာ လ (၁၈)ရက်နေ့ မနက်(၆)နာရီအချိန်တွင် ၀င်ရောက်တိုက်ခိုက်ခဲ့ရာ ခလရ(၅၈)တပ်ဖွဲ့ဝင်(၈)ဦး ကျဆုံးကာ အများအပြားထိခိုက်ဒဏ်ရာရ ကြောင်း သိရှိရသည်။
ဘွမ်တောင်စခန်းတွင် အခြေပြုလှုပ်ရှားသော မြန်မာအစိုးရတပ်ဖွဲ့တို့ သည် မြစ်ကြီးနား – ကန်ပိုင်တီ သွား ခရီးသည်၊ ကုန်သည်များမှ ငွေကြေးအတင်းအဓ္ဓမတောင်းယူလျက်ရှိသဖြင့် ခရီးသည်တင်ယာဉ် မောင်း များ အတွက် အမြဲစိတ်ညစ်စေသော တပ်စခန်းဂိတ်လည်း ဖြစ်သည်။ ယင်းဘွမ်တောင်တပ်စခန်းသည် ၂၀၁၁ ခုနှစ် အောက်တို ဘာလ KIA တပ်ဖွဲ့မှ တပ်မ(၈၈)တပ်ဖွဲ့များ သိမ်းပိုက်လိုက်သော တပ်စခန်းလည်းဖြစ်သည်။

ထိုးစစ်အတွက် ပြင်ဆင်
 ဒီဇင်ဘာလ(၁၈)ရက်နေ့ မနက်(၁၀)နာရီမှ မွန်းလွဲ(၂)နာရီကြား မြစ်ကြီး နား(၅၀၃)နန့်ပေါင်လေတပ်စခန်းမှ စစ်ရဟတ်ယာဉ်ဖြင့် စကခ(၃)နည်း ဗျူဟာ အခြေပြုသော လောရင်းရာဘာခြံသို့ လက်နက်၊ စားနပ်ရိက္ခာ တို့ကို (၈)ကြိမ် လာရောက်ပို့ဆောင်ပေးခဲ့သည်။ အပြန်တွင် စကခ(၃)မှ ဒဏ်ရာရတပ်ဖွဲ့ဝင်များကို သယ်ဆောင်သွား ခဲ့ကြောင်း သိရှိရသည်။
မွန်းလွဲ(၃)နာရီမှ (၅)နာရီအတွင်းတွင် ယင်းရာဘာခြံသို့ ရဟတ်ယာဉ် (၃)စီးဖြင့် တပ်ဖွဲ့များကို ထပ်မံပို့ဆောင် ပေးခဲ့သည်။
လောရင်းရာဘာခြံတွင် အခြေချထားသော စကခ(၃)နည်းဗျူဟာသည် KIA ဗဟိုဌာနချုပ် ကို ထိုးစစ်ဆင်ရန် အဓိကတာဝန်ယူရသော စစ်စခန်း ဖြစ်သည်။ ဒီ-၁၄ စစ်ဆင်ရေးစီမံချက်ကိုလည်း ယင်းဗျူဟာစခန်းမှ အနီးကပ် ညွှန်ကြားခဲ့သည်။ လဂျားယန်ဘက်သို့ စစ်ဆင်ရေး ထပ်မံ ဆောင်ရွက်ရန် စီစဉ်လျက်ရှိကြောင်း သိရှိရသည်။

တပ်ကူဖြည့်

ဝိုင်းမော်မြို့နယ် ရွှေညောင်ပင်အခြေစိုက် ခမရ(၃၂၁)တပ်စခန်းသို့ ဒီဇင်ဘာလ(၁၈)ရက်နေ့တွင် လက်နက်၊ ရိက္ခာ နှင့် တပ်ဖွဲ့ဝင်အပြည့် တင်ဆောင်ထားသော စစ်ယာဉ်(၃)စီး ရောက်ရှိကြောင်း သိရှိရသည်။ ယင်းမှနေ၍ ဆမား၊ နာဖေါ့၊ ပါဂျိုဒေသသို့ စစ်ဆင်ရေး ပြုလုပ်လေ့ရှိ သည်။

တပ်အင်အားတိုးမြှင့် ပို့ဆောင်
ဒီဇင်ဘာလ(၁၈)ရက်နေ့ မွန်းတည့်(၁၂)နာရီအချိန်တွင် ဗန်းမော်မြို့မှ စစ်ယာဉ်(၁၂)စီးဖြင့် အင်အား(၃၀၀)ခန့် (တပ်မ ၉၉ လက်အောက်ခံ တပ်ဖွဲ့ဟု ခန့်မှန်း) သည် ကျောက်စခန်း(Hka Wan Bang)သို့ ရောက်ရှိ ခဲ့ ကြောင်း သိရှိရသည်။ ယင်းစစ်ကြောင်းသည် KIA တပ်မဟာ(၃)ဒေသ အတွင်း စစ်ဆင်ရေးပြုလုပ်ရန် စီစဉ်လျက် ရှိကြောင်း သိရသည်။

တိုက်ပွဲ
ဒီဇင်ဘာလ(၁၇)ရက်နေ့ မွန်းတည့်(၁၂)နာရီအချိန်ခန့်တွင် ဒေါ့ဖုန်း ယန်အခြေစိုက် ခလရ(၁၄၂)တပ်ဖွဲ့နှင့် KIA တပ်ဖွဲ့ဝင်တို့ ဖက်ကေ (Hpa-ke)ဒေသတွင် တိုက်ပွဲဖြစ်ပွားရာ KIA ၏ မိုင်းဆင်တိုက်ပွဲ၌ ခလရ(၁၄၂)တပ်ဖွဲ့ဝင် များ အများအပြားထိခိုက်ကျဆုံးကြောင်း သိရှိရသည်။

အထူးစစ်ရေး လေ့ကျင့်နေ
 
ဗန်းမော်မြို့သို့ သင်္ဘော(၂)စီးဖြင့် ရောက်ရှိလာသော မြန်မာအစိုးရ တပ်ဖွဲ့တို့သည် ဗန်းမော်မြို့အခြေစိုက် ခလရ(၂၃၆)တပ်ဝင်းထဲတွင် တိုက်ပွဲဝင်ရန် ပစ်ခတ်တိုက်ခိုက်မှုကို အထူးလေ့ကျင့်နေကြောင်း သိရှိရသည်။

ဒေသခံများပြောဆိုချက်အရ ပြည်မ ရှိ စစ်တိုင်းဌာချုပ် တိုင်းမှ ထုတ်နုတ် ထားသော အထူးတပ်ဖွဲ့ဝင်များ ဖြစ်ကြောင်း သိရှိရသည်။


No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။