Monday, October 22, 2012

KAMAING, NAM SI EN MARE NA MABYIN

(Jinghpawkasa)



Wunpawng Mungdan Shanglawt Asuya, Sinna Ginwang Dap Ba (2) Up Hkang Ginra rai nga ai, Mohgaung - Kamaing lam ntsa na Nam Si En mare buga hta October (19) ya shani myen hpyen asuya a hpyen hpung hk-l-y (89) ni shang wa nna mare masha ni hpe mara kata adup zingri lai wa sai lam hpe na chye lu ai.



Myen hpyen asuya hpyen hpung ni gaw October (19) ya shani hta a kajawng sha Nam Si En mare de du shang wa nna mare baw kawn sina ni gap let marawn jahtau nna Mare kata de yan shang wa ai re lam na chye lu ai. Unicief kaw na Hkali Ana Shamat Masing the Nam Si En mare kaw du nga ai Kamaing mare na Saranum Lum Noi hpaw tsun dan lai wa ai hta, “Myen hpyen hpung ni gaw mare baw kawn sinat ni ma ja gap le yan shang wa ai re lam, mu manu mare masha ni hpe mare ka-ang mawdaw lam kaw mahkawng da majaw da ai re nga tsun shana wa ai, shi matut tsun ai hta myen hpyen ni kawn la ni hpe gaw htawng hkindit, bye ai sha n n ga, shanhte a sina ni hte mung a dip zingri ai lam, asak (5) ning ram sha re ai Zau Nu hpe mung “nang mung kaba wa yang KIA rain a re” ngu nna hkindit matsut kau dat ai lam tsun dan lai wa ai. Bai nna, Mawa Awng hpe gaw myen hpyen ni grau nna n dum n dam rai hkra a dup zingri kau lai wa sai lam, Mawa Awng a nta kaw arrow dazik labu galu atsi hpe mu ai majaw KIA hpyen la re ngu nna adup zingri ai sha n ga, n htu hte mung gamai lai wa sai lam chye lu ai. Mawa Awng a nta na gumhpraw ni, ja rai ni ni hte U Wa arung arai ni yawng hpe mung myen hpyen la ni la kau ya ai lam chye lu ai.

Myen hpyen la ni gaw Kamaing mare de na shatmai shammaw tam hkawm ai dinggai ni hpe mung rim woi nna Nam Si En mare de woi wa ai lam, mare de du yang dinggai ni hpe san san, ma kaji ni hpe san san, la wa ngan ni hpe san san rai lam lamaw n tsa kaw baw pi n lu dap hkra mahkawng da na a zup zingri ai re lam na chye lu ai. Labyawng Gun hpe mung shi a nta hta marain labu galu hpe mu hkrawk la ai majaw myen hpyen la ni kawn shanglawt hpyen la re ngu mawdawm lam n tsa hta gyit htungku tawn nna si na daram a dup zingri kau sai lam. Mare masha ni hpe myen hpyen ni adup zingri taw ai lam na ai majaw kajawng kaja lagat sa wa nna shi mare masha ni hpe n zingri ya na matu sa hpyi nem ai Nam Si En mare na Mare salang Sam amyu sha Naing Lin hpe mung myen hpyen la ni kawn n dum ndam rai hkra a dup zingri kau lai wa sai lam matut na chye lu ai.

Nam Si En mare kaw na ma (8) a kanu rai nga ai Jan. Lahpai Pri kawn mung shi mu mada hkrum sha lai wa ai lam ni hpe ya na zawn Jinghpaw Kasa de tsun dan lai wa ai. “ Labyawng Gun hte Sam salang Naing Lin yen hpe shanhte nta de woi shang wa nna, Jan Lahpai Pri kaw sum ri hpyi ai lam, Jan Lahpai Pri kawn sumri n nga ai lam tsun yang, myen hpyen la ni kawn htingka, shingnoi jinghpa ni jaw rit ngu bai hpyi wa ai lam, ngut na Jan Lahpai Pri hpe myen hpyen la ni kawn shat shadu ya na matu tsun wa ai lam, Jan Lahpai Pri kawn mung hkrit mai majaw n lu n lawm rai htingbu ni kaw na hkoi da ai n gu kawk (10) hpe shadu ya lai wa sai lam ni tsun dan wa ai. Bai hkai pyep (2) hpe mung la wa nna, n kau hpe shadu na, n kau hpe hkraw hkra rai gangau ya na matu tsun wa sai lam tsun na chye lu ai.
Jan Lahpai Pri matut tsun wa ai hta, “Labyawng Gin hpe gaw jahpawt daw hkying (2:00AM) ram du hkra a dup zingri taw ma ai re, Sam salang wa na n sen gaw hpa nga nna mat ai, jahpawt hkying (5:00AM) ten ram hta gaw hpyen la ni hpe rai lawan ladan zing shangun nna anhte nta na myen hpyen la ni gaw pru mat wa sai, ngai mung, nta na myen hpyen la ni pru mat wa ai hpang ramram na ai hpang hkan pru yu yang, nta shawng na htingbu nta kaw gaw myen hpyen la ni naw nga taw ai,” nga nna tsun dan lai wa sai.

Myen hpyen la ni gaw Labyawng Gun hte Sam salang Naing Lin yen hpe hpyen palawng jahpun nna woi mat wa ai lam na chye lu ai.

Myen hpyen la ni ndai zawn mare masha ni hpe azup zingri nga ai ten Kamaing de na jawng yu nna Cycle hte wa ai jawng ma (4) hpe mung myen hpyen la ni hkap jahkring nna jahkrit shama ai lam ni galaw lai wa sai lam na chye lu ai. N dai jawng ma (4) hta lawm ai tsang (7) jawngma Zau La gaw shi a hkam sha lam hpe “Anhte a mare masha ni hpe myen hpyen la ni kawn n dai zawn mara kata adup zingri ya ai majaw grai myit n dik ai, myen ni hpe mung grai myit machyi ai, myen amyu ni htum mat hkra yawng hpe htau sat kau mayu ai, ya ngai kaba wa nna hpaji hkum wa yang mung Myu hte Mungdan hpe makawp maga na matu Shanglawt Dap de shang nna magma gun na,” nga Jinghpaw Kasa de ya na zawn tsun dan wa ai.

No comments:

Post a Comment

Comment မ်ားကုိ စီစစ္ျပီး တင္ေပးပါမည္။ မုိက္ရုိင္းေသာ၊ လူသားမဆန္ေသာ Commet မ်ား တင္မေပးပါ။