Tuesday, September 25, 2012

HPRI BUM KAW MYEN (40) JAN HKRAT HPYEN DU (2) LAWM

(Jinghpawkasa)

Wunpawng Mungdan Shanglawt Asuya Sinna Ginwang Dap Ba (2), Uru Seng Maw, Hpri Bum hta KIA myu tsaw share ninghkring ni hte myen hpyen ni September (24) ya shani gasat ai hte myen asuya maga na hpyen la ni marai (40) jan bai hkrat sum wa sai lam, ya na zawn hkrat sum ai hta myen hpyen du (2) mung lawm ai lam shiga na chye lu ai. N dai zawn Hpri Bum kaw gasat ai hta myen asuya hpyen hpung ni gaw n gun (1,000) jan lang nna lak nak kaba ni hte n hkring n sa gap sharu bun ai majaw KIA myu tsaw share ninghkring ni mana de Hpri Bum kaw na gan yen kau da sai lam hpe mung na chye lu ai. KIA myu tsaw share ninghkring ni yawng Karai a shaman chyeju a marang e langai pi hkala n ba n hkrum ai sha mana de hkying (10:00PM) ten ram hta Kanu hpyen dap de bai du shang wa lu sai lam hpe mung matut na chye lu ai.


Hpri Bum hta KIA myu tsaw share ninghkring ni hte myen asuya hpyen hpung ni gasat ai hta myen hpang lawm ai Jinghpaw Myu Sha Pyithusit hpyen la ni mung grai lawm ai lam, hkala n ba hkrum ai shaloi Jinghpaw ga hku marawn jahtawn ai lam hte KIA myu tsaw share ninghkring ni kawn hkye la na n mai byin ai lam hte dan re ni hpe myen hpyen la ni kawn bai gap shanang kau ai ni mung lawm ai lam na chye lu ai. Myen asuya hpyen hpung ni gaw Jinghpaw Myu Sha Pyithusit hpyen ni hpe shawng lam de ganaw shangun nna shanhte gaw hpang lam kaw na sha gap ai re lam, dai majaw n dai Pyithusit ni gaw KIA hte myen asuya hpyen hpung a lapran matep da hkrum nna grau hkala hkrum ai re lam shawng lam majan pa kawn na chye lu ai. Ya na zawn Pyithusit tai nna myen tai hpyen ni hpang de lawm nga ai Pyithusit hpyen la ni hpe dum nta masha ni kawn shaga la, hprawng kau shangun rai yang kaja ai, nrai yang Majan hta hkrat sum ai gaw Jinghpaw Myu Sha ni chyu re lam hte KIA kawn majan n sum ai rai tim, majan hta Pyithusit tai nna myen tai hpyen ni maga lawm ai myu sha ni law law wa hkrat sum nga ai majaw majan sum ai hta pi grau myit n pyaw ai lam Shawng lam majan pa hta lawm ai Myu Tsaw Share Ninghkring ni kawn tsun dan wa ai lam hpe na chye lu ai.

No comments:

Post a Comment

Comment မ်ားကုိ စီစစ္ျပီး တင္ေပးပါမည္။ မုိက္ရုိင္းေသာ၊ လူသားမဆန္ေသာ Commet မ်ား တင္မေပးပါ။