Wednesday, August 22, 2012

တရုတ်ဖက်ခြမ်းမှ ကချင်စစ်ပြေးများကို KIO နယ်မြေသို့ ခက်ခက်ခဲခဲ ပြောင်းရွှေ့နေ

(ကချင်သတင်းဌာန)



တရုတ်ပြည်နယ်သို့ ထွက်ပြေးခိုလှုံနေကြသော နောင်တောင်း (Nongdao) ရှိ ဒုက္ခသည်စခန်း ၆ ခုကို မြန်မာပြည်ဖက်ခြမ်းရှိ ကချင် လွတ်မြောက်ရေးအဖွဲ့ (KIO) အုပ်ချုပ်နယ်မြေ လနာ့ဇွပ်ဂျာ (Lana zup Ja) စခန်းသို့ ပြောင်းရွှေ့ရန် KIO အရာရှိများ ညွှန်ကြားပြီးနောက် ဒုက္ခသည်အချို့သည် မိုးတွင်းမှာ ခက်ခက်ခဲခဲ မိမိသွားလိုရာ စခန်းများသို့ အသီးသီးပြောင်းရွှေ့နေကြသည်။

“အိမ်ခြေ ၅၀ လောက်က မန်ဝိန်းသို့ပြန်သွားကြတယ်။ တချို့က လနာ့ဇွပ်ဂျာဖက်ကို ပြန်တယ်။ တနင်္ဂနွေနေ့တောင်မနားဘူး ပြန်နေကြ တယ်။ ပြောင်းသွားတာကတော့ နေရာတကာပါပဲ။ ဘယ်လိုပြောရမယ် မှန်းတောင်မသိတော့ဘူး။ ဒီမှာနေတာ အနေထိုင်လာတဲ့အချိန်မှာမှ ပြန်ပြောင်းခိုင်းတယ်။ အခုချိန်ဆို မိုးကလည်းအမြဲတမ်းရွာနေတယ်။ ကလေးတွေ သက်ကြီးတဲ့သူတွေက မိုးထဲမှာ ပြောင်းနေကြရတယ်” ဟု ဒုက္ခသည်စခန်းမှ တာဝန်ရှိသူတဦးပြောသည်။

ထို့သို့ပြောင်းရွှေ့ရာတွင် မန်ဝိန်းအသင်းတော် ၂ ခုရှိ ဒုက္ခသည်စခန်း များသို့ ပြောင်းရွှေ့လာကြသော ဒုက္ခသည်များကို နေရာထိုင်ခင်းမလုံ လောက်မှုကြောင့် လူသစ်များကို ထပ်ပြီးလက်မခံနိုင်တော့ကြောင်း ပြောဆိုခဲ့ရာ တချို့ဒုက္ခသည်များသည် အခက်ခဲကြုံနေရပြီး အနီးအနားတွင် အိမ်ငှားရမ်းပြီး နေထိုင်နေကြကြောင်း သိရသည်။

မိသားစုများ ပြောင်းရွှေ့လိုသည့် စခန်းအသီးသီးသို့  ပြောင်းရွှေ့ သွားကြသော ဒုက္ခသည်များတွင် အထူးသဖြင့် ကျောင်းသူ ကျောင်းသားများအတွက် ပညာရေးနစ်နာမှုရင်ဆိုင်နေရကြောင်း နောင်တောင်းဒုက္ခသည်စခန်းမှ ဆရာမတစ်ဦးပြောသည်။
“ပြန်သွားတဲ့ ကလေးတွေက တနှစ်ပြန်နာတော့မယ် မိဘတွေက အဲဒီလို ပြောင်းသွားရင်တော့ ကလေးတွေလည်း ပါသွားပြီလေ။  အဲလိုဆိုတော့ ကလေးတွေက ကျောင်းက တဝက်တပျက်ဖြစ်နေပြီ ကလေးတွေအတွက် အခက်အခဲဖြစ်သွားပြီ။ ကျောင်းသားတွေက ကိုယ့်ဆရာမနဲ့မဟုတ်တော့ သင်ခန်းစာတွေ သူ့တို့အတွက် အသစ်ပြန်ဖြစ်သွားပြီလေ” ဟု ဒုက္ခသည် ဆရာမတဦးဆိုသည်။
နောင်တောင်း (Nongdao) ဒုက္ခသည်စခန်းတွင် ပညာသင်ပေးနေသော ဆရာဆရာမများသည် လနာ့ဇွပ်ဂျာ (Lana Zup Ja) ဒုက္ခသည်စခန်း သို့ပြောင်းရွှေ့သွားခြင်းဖြစ်ပြီး ကျောင်းသားကျောင်းသူများမူ မိဘများသွားလိုသည့် တခြားသောစခန်းအသီးသီးသို့ ပြောင်းရွှေ့ သွားခြင်းကြောင့် လက်ရှိ ၃၀၀ နီးပါးရှိသော ကျောင်းသားများပညာရေး အတွက် ဆုံးရှုံးနစ်နာမှုဖြစ်စေမည်ကို စိုးရိမ်ပူပန်မိကြောင်း ၄င်းတို့ ဆရာမများက ပြောသည်။

တရုတ်အစိုးရမှ ပြောင်းရွှေ့ခိုင်းသော ဒုက္ခသည်စခန်း ၆ ခုတွင် ယခု မိုးရာသီဖြစ်သောကြောင့် လမ်းပန်းဆက်သွယ်ရေးခက်ခဲသည့် စခန်း ၄ ခုကို မရွှေ့ရသေးပဲ လော့ဖိုင်း (Law Hpai)စခန်းနှင့် ယန်လု (Yang Lu) ဒုက္ခသည်စခန်းကို ရှေးဦးစွာပြောင်းရွှေ့ဖို့ ဖိအားပေးနေသောကြောင့် မိသားစုများသည် မိုးအဆက်မပြတ်ရွာသွန်းသော်လည်း မရပ်မနားပြောင်း နေကြသည်။ ယနေ့တွင် အားလုံး ပြောင်းရွှေ့မည်ဖြစ်ကြောင်း သိရသည်။

တိုင်းတပါးလူမျိုးများ လာရောက်နေထိုင်ရန် မလိုလားသော တရုတ် အစိုးရသည် ၄င်းတို့နယ်မြေတွင် ၁ နှစ် ကျော်ကြာ ခိုလှုံနေသော ကချင်ဒုက္ခသည်များကို  တိုက်ပွဲများနှင့် သေနတ်သံများ စဲသွားပြီဖြစ် သောကြောင့် မိမိနေရပ်သို့ ပြန်လည်ခိုလှုံရန် ဖိအားပေးလာခဲ့ခြင်း ဖြစ်ကြောင်း KIO အရာရှိများပြောသည်။

သို့သော် ကချင်လွတ်မြောက်ရေးတပ်ဖွဲ့ KIA နှင့် အစိုးရတပ်ဖွဲ့သည် နေ့စဉ် KIO ဌာနချုပ် နယ်မြေနှင့် KIO အခြေချရာစခန်းတွင် တိုက်ပွဲများ ဖြစ်ပွားနေပြီး လက်နက်ကြီးများပစ်ခတ်မှုရှိနေသောကြောင့် နေရပ်တွင် ခိုလှုံရန် စိုးရိမ်ပူပန်နေကြသည်။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။